Hazırda həbsdə olan sabiq səfir Eldar Həsənovun qızı Səbinə Hüseynova atasının səhhəti ilə bağlı Prezident İlham Əliyevə və 1-ci Vitse-prezident Mehriban Əliyevaya müraciət etdi:  

"21.6 milyon manatlıq korrupsiya ittihamına görə həbs olunan “Azərxalça”nın sabiq rəhbəri Vidadi Muradov barədə həbs qətimkan tədbirinin dəyişdirilməsi, məhkəmənin qərarı ilə azadlığa çıxması ümidlərimizi çox artırır. Əlbəttə, humanist qərardır. Ağır xəstəliyi olan şəxsin azadlığa buraxılmasını alqışlayırıq. Amma... Çox istərdik ki, bu humanist və ədalətli münasibət mənim atam, sabiq səfir, hazırda məhkəməsi gedən Eldar Həsənova da şamil olunsun. Bir daha Prezident İlham Əliyevə və 1-ci Vitse-prezident Mehriban xanım Əliyevaya səslənmək istəyirəm: atamın səhhəti çox ağırdır. Təcili ürəyində əməliyyat aparılmalıdır. Yüksək təzyiq və şəkərli diabetdən əziyyət çəkir. Vertiqo xəstəliyinə təcridxanada olduğu 14 aylıq müddətdə tutulub. Ürəkgetmələri var, tez tez huşunu itirir. Hər dəfə onun huşunu itirərərək yerə yıxıldığını eşidəndə və ya gözümlə şahidi olanda nələr keçirdiyimi ifadə etmək belə istəmirəm. Dəhşətli hisslərdir, heç kəsə, heç bir övlada arzu eləmirəm... Lütfən, atam barəsində həbs qətimkan tədbirinin dəyişdirilməsinə, normal şəkildə müalicə almasına kömək edin... Bu gün bizim ədalət və humanist münasibətə çox ehtiyacımız var...            

Məhkəməsi başlayandan bu günə kimi atam 3 dəfə huşunu itirərək yıxılıb. Hər prosesdə vəziyyətinin necə pisləşdiyini hakim daxil, hər kəs görür. Amma ədalətli qərar verə bilmirlər. Səbəb nədir? Sabiq baş prokuror, 20 il 4 ölkədə Azərbaycan dövlətini yüksək səviyyədə təmsil etmiş fövqəladə və səlahiyyətli səfir, alim, ziyalı, 28 kitabın müəllifi... daha nələri sayım, Eldar Həsənova ədalətli münasibət sərgiləmək çoxmu çətindir? 67 yaşlı xəstə bir insanı həbsxanada və ya məhkəmə zalında öldürmək Azərbaycan dövlətinə başucalığı gətirəcəkmi? Bunumu istəyir hakim? Axı mən və mənim ailə üzvlərim
Azərbaycan dövlətinə, onun hüquq-mühafizə orqanlarına atamın qatili kimi baxmaq istəmərik, heç vaxt istəmərik. Allah yazdısa, pozsun!!! Biz bu ölkəni, bu vətəni canımız qədər, atam qədər sevirik! Amma əgər həbsdə olduğu müddətdə onun başına bir iş gəlsə, bizim vəziyyətimizi təsəvvür edirsinizmi? Problem nədir? Atam bu ölkəyə ermənidən də qatı düşməndir? Hətta  düşmənə də humanizm nümayiş etdirib bu dövlət. Nə olar, atamı da görün, onun ağrılarını, əzablarını da görün. Bütün həyatını, fəaliyyətini bu ölkəyə ləyaqətlə xidmət etmiş bir insanı niyə təcridxanada ölümə məhkum etmisiniz? Günahsız bir insandan istədiyiniz nədir? Atam hər şeyə hazırdır, ölümə belə. Amma mən, bir övlad olaraq, onun yoxluğuna hazır deyiləm. Özü də günahsız, suçsuz olduğunu bilə-bilə! Atamla son görüşdə bilirsiniz, mənə nə dedi? Dedi ki, günahsız olduğum gec-tez aşkara çıxacaq, təsdiqini tapacaq. Buna əminəm. Amma o günü görməyə ömrüm çatacaqmı, bilmirəm. Əgər həyatda olmasam, bəraət almağım üçün bütün addımları atmağı sənə tapşırıram..."

Dalidag.az