Kəlbəcər rayonu ərazisində ölüm və xəsarətlə nəticələnən ağır yol-nəqliyyat hadisəsi baş verib.
Dalidag.az-ın məlumatına görə, bədbəxt hadisə Kəlbəcər–İstisu avtomobil yolunun Kəlbəcər şəhərindən keçən hissəsində qeydə alınıb. Kəlbəcər şəhər sakini, 1967-ci il təvəllüdlü Bilal Nuriyev idarə etdiyi "Kia" markalı minik avtomobili ilə hərəkətdə olarkən idarəetməni itirib. Nəticədə nəqliyyat vasitəsi yoldan çıxaraq yol kənarındakı divara çırpılıb.  
Ağır xəsarətlər alan sürücü B.Nuriyev hadisə yerindəcə dünyasını dəyişib. Qəza zamanı avtomobildə olan onun həyat yoldaşı, 1975-ci il təvəllüdlü Əminə Nuriyeva isə müxtəlif dərəcəli bədən xəsarətləri alıb.  
Hadisə yerinə dərhal hüquq-mühafizə orqanlarının əməkdaşları cəlb olunub.  
Faktla bağlı araşdırma aparılır.