Füzuli Rzaquliyevin xatirəsinə

Bəzən bir insan dünyadan köçür, amma onun ömür yolu, mübarizəsi, daşıdığı məsuliyyət və arxasında qoyduğu izlər yaşayır. Elə insanlar var ki, onların həyatını illərlə deyil, Vətənə xidmətlə, mübarizə ilə, sədaqətlə ölçmək lazımdır.

Birinci Qarabağ müharibəsinin iştirakçısı, "Azərbaycan Vətən Müharibəsi Veteranları" İctimai Birliyinin sədri Füzuli Ədəb oğlu Rzaquliyevin vəfatı xəbərini dərin hüznlə qarşıladıq.
O, həyatının bir mərhələsində Vətənin taleyinin həll olunduğu ağır günlərdə döyüş meydanında, sonrakı mərhələdə isə veteranların hüquqlarının, problemlərinin və haqq səsinin müdafiəsi yolunda mübarizə aparan insanlardan biri idi.
Müharibə bitəndə hər şey bitmir. Döyüş meydanından qayıdanların yaraları, xatirələri, itkiləri və unudulmayan ağrıları davam edir. Veteran olmaq təkcə keçmişdə döyüşmək deyil, həm də o keçmişin məsuliyyətini ömrünün sonunadək daşımaqdır.
Füzuli Rzaquliyev də bu məsuliyyəti daşıyan insanlardan idi. Onun rəhbərlik etdiyi ictimai birlik veteranlıq missiyasının, döyüş yoldaşlığına sədaqətin və Vətən qarşısında xidmətin ifadəsi idi.
Bu gün onun fiziki yoxluğu ilə bir ömürlük mübarizə yolu başa çatır. Ancaq Vətən uğrunda çəkilən zəhmət, döyüş yoldaşlarına göstərilən sədaqət və insanın cəmiyyətə bəxş etdiyi dəyərlər ölümlə bitmir.
Bəlkə də insanın ən böyük ömrü torpağa tapşırıldığı gündən sonra xatirələrdə yaşadığı ömürdür.
Füzuli müəllim, Vətənə xidmət yolunuz, veteranlıq fəaliyyətiniz və xatirəniz ehtiramla anılacaq.
Allah rəhmət eləsin! Ruhunuz şad, məkanınız cənnət olsun!
Vətənə xidmət unudulmur, Vətən fədailəri xatirələrdə yaşayır!

 Vüqar Şirinoğlu, 
Birinci Qarabağ müharibəsi veteranı
Dalidag.az