Müasir dövrün tələblərindən ən vacibi hesab edilən internet resurslarından istifadənin hamı üşün əlçatan olması dövlətimizin sosial siyasətinin tərkib hissəsidir. Pandemiya şəraitində vətəndaşlarımızın bir-biri ilə daha az təmasda olmasının vacibliyini nəzərə alsaq, bu baxımdan məsələ daha da aktuallaşır. 
Məcburi köçkün şəraitində ölkəmizin müxtəlif rayonlarında məskunlaşmış həmyerlilərimizin internet resurslarından istifadə etməklə mərkəzi icra orqanlarına online (internet vasitəsi ilə) ərizə və şikayətlərinin göndərilməsinin səviyyəsini aydınlaşdırmaq məqsədi ilə Kəlbəcər rayon icra hakimiyyətində ümumi şöbənin müdiri vəzifəsini icra edən  Xanoğlan Əhmədova müraciət etdik. Xanoğlan müəllimin açıqlamalarından belə aydın oldu ki, vətəndaşların rayon icra hakimiyyətinə ünvanladıqları məktublar, əsasən, ənənəvi qaydada, yəni rabitə şöbəsi vasitəsi ilə poçtla göndərilməyə üstünlük verilən məktublardır. Xanoğlan Əhmədov ümumi şöbəyə daxil olan məktubların əksəriyyət hissəsinin  Respublikanın mərkəzi təşkilatlarına (Prezident Aparatı, Qaçqınların və Məcburi Köçkünlərin İşləri Üzrə Dövlət Komitəsi və s.) ünvanlanmış ərizə və şikayətlərin baxılması üçün  yönəldilmiş ərizələr olduğunu bildirdi. Vətəndaşların online ( internet vasitəsi ilə ) Kəlbəcər rayon icra hakimiyyətinə birbaşa  müraciəti isə azlıq təşkil edir.
Bu kiçik araşdırmamızdan görünür ki, məcburi köçkünlər ərizə və şikayətlərini hələ də ənənəvi qaydada yazmağa üstünlük verirlər. Ancaq yaxşı olardı ki, vətəndaşlarımız uzun vaxt aparan yazışmalardan əl çəkərək sürətli internet resurslarından istifadəyə üstünlük verməklə online (internet vasitəsi ilə) müraciəti daha çox işlədəydilər. 
                                                       
Oqtay SALAHLI
Dalidag.az