Həyata göz açandan evində əmisi İbrahimin hərbi geyimini görmüş, bu geyimdə olmağı özü də arzulamışdı. Bu arzuya 25 yaşında, 2020-ci il iyulun 29-da çatanda uçmağa qanadı yox idi. Hərbi geyimi ona necə yaraşırdısa, valideynləri də onun hərbçi olmağına etiraz edə bilmədilər.
Şəhid Allahverənov Məhəmməd Zöhrab oğlu 1995-ci  ildə Bərdə  rayonunun Çəmənli  kəndində anadan olmuşdur. Uşaq yaşlarından əmisi İbrahim Allahverənovun hərbi geyimi həmişə onun xoşuna gələrdi. Məhəmmədin adını da əmisi İbrahim qoymuşdu. İbrahimlə Zöhrabın ataları Məhəmməd kişi vaxtı  ilə Dərələyəz mahalından Kəlbəcər rayonunun Milli kəndinə köçmüş, orada  məskunlaşmışdılar. Sonralar onlar Bərdə rayonunun Çəmənli kəndinə  köçmüş və İbrahim Allahverənov da burada  birinci sinfə  getmişdir. İbrahim Allahverənov Azərbaycan Dövlət Universitetinin tarix fakültəsini bitirəndən sonra yalnız hərbi işlərdə işləyib. Müxtəlif vəzifələrdə işləməklə polkovnik-leytenant rütbəsinə qədər yüksəlmişdir. Moskvada və Qazaxıstanda, daha sonra Azərbaycanda hərbi vəzifələrdə çalışmışdır.
1990-cı  illərdə  Qarabağ Regional Mülki Müdafiə idarəsinin rəisi işlədiyi dövrdə Qarabağda ermənilərin separatçı hərakatının başlanması bütün azərbaycanlılar kimi həmin idarənin əməkdaşlarının da işlərində xüsusi çətinliklər yaratdı. Bütün çətinliklərə baxmayaraq Regional idarənin əməkdaşları polkovnik-leytenant ibrahim Allahverən ovun rəhbərliyi altında üzərlərinə düşən vəzifələrin öhdəsindən layiqincə gəlirdilər. 1993-cü ilin aprelində Kəlbəcər rayonu  Ermənistan silahlı qüvvələrinin təcavüzünə məruz qaldığı zaman Kəlbəcər rayonunundan olan qohum-əqrəbaların əksəriyyəti İbrahim Allahverənovun yaşadığı Çəmənli kəndinə pənah gətirdi.
1995-ci ildə qardaşı Zöhrabın oğlu olanda İbrahim ona Məhəmməd adını verdi. Məhəmməd böyüdükcə ata-anası  ilə yanaşı  əmisi İbrahimi də özünə ata hesab edir, onun yanından əl çəkmirdi.Həmişə onun hərbi geyimlərini geyinər, saatlarla özünü herbiçi  kimi aparardı. Ötən ilin sentyabr ayında Azərbaycan Ordusunun erməni işğalçılarına qarşı əks-hücumu başlananda Məhəmməd 3  aya yaxın idi ki, müddətdən artıq hərbi qulluqçu idi. O, hərbi əməliyyatların başlanmasını uzun illərdən bəri səbirsizliklə gözləyirdi. Odur ki, könüllü olaraq cəbhə bölgəsinə göndərilməsini  xahiş etdi.
Suqovuşan istiqamətində gedən döyüşlərdə qəhrəmanlıqlar göstərdi. Atası Zöhrabla telefon danışıqları zamanı  ona deyirdi ki, sizin 90-cı illərdə edə bilmədiklərinizi indi biz, sizin övladlarınız fədakarlıqla edirik, erməniləri torpaqlarımızdan qovuruq, onlar hər şeyi qoyub qaçırlar. Atası Zöhrab keçdiyi döyüş yollarından Məhəmmədə  o qədər danışmışdı ki... Axırıncı dəfə atasına zəng edəndə  Zöhrab ona ehtiyatlı olmağı məsləhət görmüşdü. Bir dəfə qıçından güllə yarası alan Məhəmməd sanitar hissədə yarasını sarıtdırandan sonra həkimlərin təkidinə baxmayaraq, yenidən döyüş bölgəsinə qayıtmış telefon danışıqları zamanı bu barədə atasına bir kəlmə də deməmişdi. Son danışıqları oktyabr ayının altısında olmuşdu. Ayın 7-də  düşmən atəşi nəticəsində şəhid oldu. Şəhidlik zirvəsinə yüksələndən on bir gün sonra onun cəsədini  döyüş zonalasından çıxara bildilər. O, son gülləsinə qədər vuruşmuş və neçə-neçə ermənini məhv eləmişdi.Onun meyidini bizim hərbiçilər götürəndə Məhəmmədin meyidinin yanında 11 erməni cəsədi də var idi. Azərbaycan Respublikası Prezidentinin fərmanına  əsasən Allahverənov Məhəmməd Zöhrab oğlu ölümündən sonra ,,Vətən uğrunda " və  "Suqovuşanın azad olunmasına görə" medalları ilə təltif olunub. Qəbri doğulduğu Çəmənli kənd qəbiristanlığındadır. Atası Zöhrab və anası  Sədaqət xanım övladlarının Vətən uğrunda şəhid olması ilə qürur duyurlar. Onlarla söhbətimiz zamanı 44 günlük Vətən müharibəsində  ordumuzun şanlı qələbəsi zamanı bütün şəhidlərimizlə bərabər onların övladlarının da qisasının alındığına görə qalib ordumuzla fəxr edirlər.Allah bütün şəhidlərimizə rəhmət eləsin!

Oqtay SALAHLI
Dalidag.az