Xalq artisti Arif Babayev 30 illik həsrətdən sonra doğma Ağdam torpağını ziyarət edib.
Dalidag.az xəbər verir ki, Xəzər televiziyasının “Birinci studiya” verilişinin heyəti 83 yaşlı Xalq artistini ilk olaraq ata yurdu Sarıhacılı kəndinə gətiriblər. Görkəmli xanəndə doğma kəndinin dağıntılarını görüb, göz yaşlarına hakim ola bilməyib, aparıcıdan öpmək üçün yerdən daş verməsini xahiş edib.
Xalq artisti doğma torpağını öpərək qovuşduğu günə şükür edib: “Allah şəhidlərimizə rəhmət eləsin. Biz onların qarşısında baş əyməliyik. Qan töküb torpaqlarımızı geri aldılar. Allah ordumuza can sağlığı versin!”
Arif Babayev kənd qəbiristanlığında valideynlərinin məzarlarını ziyarət etmək istəyib, amma qəbiristanlıqda salamat bir məzar olmayıb. Xalq artisti gətirdiyi qərənfilləri qırılmış məzar daşlarının üzərinə düzüb. 
Arif Babayev, həmçinin Ağdamda xidmət edən hərbçilərimizlə görüşüb, Ağdamın Cümə məscidini ziyarət edib. Canını vətən yolunda qurban verməyə hazır olan hərbçilərimiz üçün dualar edib.

Dalidag.az