Ömürlüyümdən kəsintilər
Çağımıza qədər gəlib çatan arxivlərdəki Qasımov Xaqani Abbasəli oğlu elə mənəm... Xaqani Abbasəli Öztürk. Azərbaycan Yazıçılar Birliyinin üzvü bir neçə kitab hüququ qazanmış kitabların müəllifi. Təhsilimi indiki Texniki Universitetin ögey anası olan Azərbaycan Politexnik insititutunda almışam. Siyasi düşüncəm ulusalçılıq və qisməndə milli özünü dərk fəlsəfi düşüncə tərzidir. Allaha inamım tamdı... Həyatımın dürüstlük düsturunun cavabı elə bərabərdir təmiz vicdan. Hələ sovet dönəmində Sumqayıt şəhəri komsomol komitəsində çalışdığım illərdə hər ayımın bir günlük əmək haqını uşaq fonduna köçürərdim. Vətənin müstəqilliyi uğrundakı döyüşlərdə arxada durmamışam və peşiman da deyiləm. Ailəliyəm və hətta ilahi nübar olan iki övladımda var. İlahinin dili olan və duyğu yasası saydığım şeirlər məktəb illərindən könüldaşım. Elə ədəbiyyatın bir millətin ictimai-siyasi və fəlsəfi tarixi olduğunu atamın müəllimlik missiyasını yerinə yetirdiyi dönəmlərdən özünə simgə seçdiyindən bilirəm. 
Həyatımda keşkə dediyim dönəmlər ömrümün xeylək payına sahibdi. 
Dünyayla ilk görüşüm Naxçıvan Muxtar Respublikasının Şərur Rayonunun Püsyan kəndində 1965-ci ilin 03 mart sabahına dənk gəlib. Müəllim övladı olduğumdan tənələrdən qorxaraq orta məktəbi “fərqlənmə” doplomu ilə bitirmişəm. 
İlk kitabım doxsanıncı illərdə Türkiyədə çap olunub.
İlahi dəlilərə yaslanaraq insançılıq fəlsəfi düşüncəsinə xidmət edən poeziya mənim Allahu-təala ilə könül ilişkimdir. Sağ olduğumdan bu könüldaşlıq davam edir. 
Mənə görə poeziya insan könlünə hüzür gətirən duyğularla zikr etməkdir.
Sağam, nə vaxt öləcəyimi bilmirəm, qalan ömrümü Həllacıca ibadətə adayacam.

Vaxtsız gəlmisən!

Sallana-sallana, sallanıb gələn,
İffətdən yanağı allanıb gələn.
Mələklər yurdunu  dolanıb  gələn,
Vədəsiz  gəlmisən, vaxtsız gəlmisən.
 
İçimdə tikmişəm həsrətə heykəl,
De kim  gəlişinə olurdu əngəl.
Gəlmədin  mən sənə deyəndə hey gəl,
Vədəsiz gəlmisən, vaxtsız gəlmisən.
 
Gəlmisən, bu gəliş  nəyi  dəyişər,
Şeytan baxça salıb,adın qoyub şər.
Bizim  sevdamızın yurd yeri  məşər,
Vədəsiz gəlmisən, vaxtsız gəlmisən.
 
Mən səni əhv etdim, çoxdan a zalım,
Mən səni var etdim yoxdan a zalım.
Xəbərin varmıdı vaxtdan a zalım,
Vədəsiz gəlmisən, vaxtsız gəlmisən.
 
Keçdi göz yaşımı gizlədiyim gün,
Səni  yaşam kimi  özlədiyim gün.
Bu gün deyil səni gözlədiyim gün,
Vədəsiz  gəlmisən, vaxtsız  gəlmisən.

02.05.2011

Ölüm fərmanı!

Könlüm küçələri, sənsiz bomboşdu,
Haydı qalx, geri gəl, a xəyal gözlüm.
Gözlərim sevdandan haləm sərxoşdu,
Yetər bunca çilə a hilal gözlüm.
 
Çevirib könlümü xırman yerinə,
Gözümü ağlayan irmaq etmisən.
Bürüyüb  sevdamı, güman tərinə,
Ömrümü həsrətə ortaq  etmisən.
 
Çalası çilədən olan  baxtımın,
Qapsını qəm döyür, yıllardı sənsiz.
Sən çıxıb gedəndən könül taxtımın.
İçində arzular yatır kəfənsiz.
 
Ağ bayraq qaldırıb, sənsiz  kədərə,
Həsrət işğalından üşüyür könlüm.
Mən sevda yaşını verdim hədərə,
İndi sənsizlikdən töşüyür könlüm.
 
Haydi qalx geri  gəl, gələcək isən,
Üşüyən sözümün isinsin canı.
Əgər bu həsrətlə öləcək isəm,
Həmən göndər gəlsin ölüm fərmanın.
 
03.07.2018

Yaşamaq bu isə...

Təqvim  ağacından yarpaq  düşdükcə,
Hər gün bir az daha uzaqlaşırsan.
İçimdə xatirən həp üşüdükcə,
Hər gün bir az artan üzdə qırışsan.
 
Səndə duran zaman məni  daşıyır,
Köçəri  daşıyan qara qatar  tək.
Səndə ölən sevda məndə yaşıyır,
Köksüz, təzanəsi itən, o tar tək.
 
Əzəldən, əcəldən payımı aldım,
Gəlin tək süslədim  qoşa günləri.
Yoxluğun  içindən bir körpü saldım,
Daşıdım bahardan qışa günləri.
 
Dünyanın ən uca zirvəsi bəlkə,
Mənim  könlümdəki, həsrət dağıdı.
Sakini ayrılıq olan tək  ölkə,
Gözümdü qonağı əzgi-ağıdı.
 
Sənin yoxluğundan o yana gülüm,
Nə varsa, mənimçün yovşan gülüdü.
Sənin  xatirənlə yaşayan könlüm,
Yaşamaq bu isə çoxdan ölüdü...
 
10.10.2018

Vətən

Həm məndən bu yana, həm də o yana
Gecəsi dan gəzən gözümsən Vətən
Günəşi qürubda qana boyanan
Hakk üçün soyulan sözümsən Vətən!...

Araz qəm kəməri belimdə qurşaq
Bir “yirmi faiz”də haçandı dustaq,
Günahkar axtarıb, məhkəmə qursaq
Utanan, qızaran üzümsən Vətən!...

Sənə gendən baxmaq, arıma gəlir
Təbrizsiz, Şuşasız zoruma gəlir.
Tək bircə təsəlli karıma gəlir
Alacam, sən mənim özümsən Vətən!..

Bülbül gözə gələr xoş avazınan
Barışdın baxtına düşən yazınnan
İstərəm biləsən bunu azınnan
Sən məndə, mən boyda dözümsən Vətən!..

29.04.2016

Vaxt daşımaqdan...
(Bu şeir özümə ünvanlanan təbriknamədir)

Zamanı xərclədim rüşvət kimi
Əllidən beş fazla il ala bildim
Bürünüb ilahi ruhu şərt kimi
Ömür çarşısında dik qala bildim.

Çilə dərgahında, çiləkeş oldum
Macalım olmadı, müşkülü çözəm
İmdada ömrümlə həp peşkeş oldum
İndi odu sönmüş, soyuyan közəm.

Ömürüm səhifəsi dolmuş gündəlik
Hörümçək ev tikən, rəfdə əsir.
Sələm yaşayıram ömrü hələlik
Nə qədər əzrayıl önümü kəsmir.

Daha yorulmuşam vaxt daşımaqdan
Sevdanı atmışam qəm quyusuna
İlahi bezmişəm ta yaşamaqdan
Nə olur tez yetir bu oyunu sona!

16.08.2019

Bu sabah!

Bu sabah göy üzü bəmbəyaz gəlin
Bu sabah ruhumun dili qadaxlı,
Baxtıma xış vuran şeytanın əlin
Kəsən əl gəzirəm əli çıraxlı...

Bu sabah süb şehin geyən təbiət
Sürməli gözəldi, yağmura düşmüş
Könlüm bircə eşqə eylədi biət
O, eşq atəşində təkcə üşümüş...

Bu sabah, sabahın özü biqərib
Ovunu qaçıran ovçu kimidi
Tanrı göy üzünə bir xalı sərib
Səma bu geyimdə, “savcı” kimidi.

Bu sabah bənzəmir ötən sabaha
Durna qanadından düşən lələyəm
Dünya özü boyda quduz ac kaha-
Ölümü xan Əsli məndə Lələyəm.

25.04.1998

Ömür onsuz darıxır...

Yalqız gəzər boz qurdu
Vicdandı hakkın yurdu
Ölüm ilahi nurdu
Ömür onsuz darıxar!

Aşiqlik hakka yürüş
Son görüşdü, ilk görüş
Ölüm özünə dönüş
Ömür onsuz darıxar!

Yaşamaq zaman dərsi
Dumandı,dərə sisi
Ölüm ömürün tərsi
Ömür onsuz darıxar!

İblis qədim cin adı
Dəyişməz cin inadı
Ölüm ruhun cihadı
Ömür onsuz darıxar!..

10.02.2000

Şeir surəsi!..

Bu bir şeir surəsi
Şeh payızın göz yaşı
Bulut göyün sürməsi
Dərd sevdanın adaşı

Bu bir şeir surəsi
Ağılın sərhəddi var
Eşqin ağıl ötəsi
Tapındığı cəddi var.

Bu bir şeir surəsi
Qəzəb hakkın vəkili
Hər eşqin öz çiləsi
Qismətində əkili

Bu bir şeir surəsi
Allah yolu könüldü
Vicdan Allah kölgəsi
Könüldə açan güldü

Bu bir şeir surəsi
Eşq ilahi şəmidi
Fırlanan yer kürəsi
Külli-sirlər cəmidi!...

07.02.2013

Səni!

Ağlayır içimdə rəsmin,
Yox ümüdü  həvəsimin.
Titrəyən yazıq  səsimin,
Tutacaq  qarğışı səni!...
 
Dündə qalıb,  aşiq  çağım,
Söz  dinləmir əl-ayağım.
A dünyada son durağım,
Tutacaq qarğışım səni!

Acıların tarifi yox,
Dərdin qəmin tərəfi yox.
Son  ümüdün  şərəfi yox,
Tutacaq  qarğışım səni!....
 
Yıxıldı o, könül dağım,
İçim  fəna dağım-dağım.
Sönən,susan  od-ocağım,
Tutacaq  qarğışım səni!...

02.08.2014

Eşqin  sözü!

Ulduz  doğmuş gecələr,
Göy eyzən çilli gözəl.
Sakit, siyah küçələr,
Aşiqlər  üçün  özəl...
  
Ağacların  saçını,
Meh  darıyır həfifcə.
Ayrılığın  suçunu,
Öpüş çözür təbibcə.
 
Pıçhapıçla dodaqlar,
Birbirinə naz satır.
Yad səsə kar qulaqlar,
Öz hay küyündən batır.
 
Kipriklər  çətir kimi,
Gizləyir qara gözü.
Nəfəslər ətir kimi,
Hər nəfəs eşqin  sözü...
 
Ürəyin  döyüntüsü,
Bəlli olur uzaqdan.
Gecə göyün tüstüsü
Çıxır aşiq ocaqdan.

17.05.2018

Ayrılıq vida dini!

Könlümdə sevgi yandı,
Gözüm qana boyandı.
Ölüm açıq bəyandı,
Əzəl başdan aşiqə...
 
Yarın kəskin baxışı,
Səpələr sis yağışı.
Həsrət eşqin qarğışı,
Əzəl başdan aşiqə.
 
Sevgi bir özgə ərkan,
Gülü  qoruyar tikan.
Yaraşır köçmək nakam,
Əzəl  başdan aşiqə...
 
Bu bir qərib  qaydadı,
Dünya haydi-haydadı.
Qəmi dağlar boydadı,
Əzəl  başdan aşiqə...
 
Sevda yıxar sevəni,
Kim bilmir bu nəğməni.
Ayrılıq vida dini,
Əzəl  başdan aşiqə...

23.05.2008
Xaqani Abbasəli Öztürk
Dalidag.az