"...Apar məni,  ilahi
Sığınım göy üzünə.  
Kəhkəşanda bir az da
Yaxın olum mən sənə..."

Dalidag.az Fərid Muradzadənin yeni şeirini təqdim edir:

APAR MƏNİ, İLAHİ 

Apar məni,  ilahi,  
Apar məni buradan.  
Sən ey hər şeyi görən,
Sən ey gözəgörünməz
Yoxluqdan var yaradan.
Bu dünyada zülm çox,
Bu dünyada zalım çox, 
Mənim daha burada  
Dayanacaq halım yox.  
Apar məni,  ilahi
Sığınım göy üzünə.  
Kəhkəşanda bir az da
Yaxın olum mən sənə.
Istəmədən gəlmişəm
Yalan-dolan dünyaya.
Qaytar məni geriyə,
Ruhum olan dünyaya.  
Apar məni, ilahi
Göyün yeddi qatında  
Mömün dualarıyla,
Yağış damlalarıyla
Yuyum günahlarımı…
Apar məni, ilahi
Ağlım kəsəndən bəri  
Mən sənə can atmışam,  
Kövrək xəyallarında  
Surətini çəkmişəm,  
Əksini yaratmışam. 
Mən səni nur bilmişəm,  
Mən səni yar bilmişəm,  
Sənə qovuşmaq üçün
Günlərimi saymışam.
Bu dünyadan doymuşam
Apar məni, ilahi!  

Fərid Muradzadə 
Dalidag.az