"...Sən yatanda gecələr                  
Ruhum, xəyalım ilə                    
Gecənin qanadında  
sənə qonaq gələydim..." 

Dalidag.az Fərid Muradzadənin yeni şeirini təqdim edir:

***
Sən yatanda gecələr
Buludlar arasından
Oğrun-oğrun boylanıb
pəncərəndən süzülən
Ay işığı olaydım.  
Süzülüb pəncərədən otağına dolaydım,
Sənin gül camalını vurğun-vurğun süzəydim.  
Pənbə dodaqlarından  
Doya-doya öpəydim.
Yastığın üstündəki
İlan kimi qıvrılan telini qoxlayaydım
Körpə uşaqlar kimi, əllərindən tutaydım...  
Sən yatanda gecələr
Sənin yuxularına
Yuxusuz gözlərimlə keşik çəkəydim gülüm
Sən yatanda gecələr gəlib səndən xəbərsiz
Durub başının üstə sənə layla çalaydım.  
Heç zaman yazılmayan
Heç zaman deyilməyən  
heç zaman oxunmayan bütün şeirlərimi
Sənunçün oxuyaydım, ruhunu oxşayaydım.
Sən yatanda gecələr                  
Ruhum, xəyalım ilə                    
Gecənin qanadında  
sənə qonaq gələydim.                      
Sən yatanda gecələr              
Dan yeri ağarmamış azan səsi olaydım                            
Yayılıb dalğa-dalğa ruhuna toxunaydım.                              
Bir meh olub çöhrəndən,
Yanağından öpəydim            
Səssiz gəldiyim kimi səssiz çıxıb gedəydim.                        
Sən yatanda gecələr.....

Fərid Muradzadə 
Dalidag.az