Dalidag.az Mürvət Qədimoğlu Həkərinin Vətən müharibəsində qazandığımız Böyük Qələbə sevincini əks etdirən şeirini təqdim edir:

MƏNİM ZƏFƏR BAYRAMIM

Bu dünya görməmişdi hələ belə toy-düyün,
Sevincinə çevrildi bu sevinc yerin, göyün.
Bu şanlı qələbənlə öyün Türk oğlu, öyün,
Səs saldı bu dünyaya mənim hünər bayramım,
Mənim zəfər bayramım!

Şən günümdə yetişdi ər oğlu Ərdoğanım,
Dar günümdə başlara dolu kimi yağanım.
İlhamımın köksünə qardaş kimi sığanım,
Tarixdə tarix yazdı bax, bu səhər bayramım,
Mənim zəfər bayramım!

Sevinci yoxa çıxdı farsın, rusun, ərəbin,
Qışın oğlan çağında nur yaydı al səhərin.
Hər şeyi yaxşı görür uca Tanrım, o rəbbim.
Yox oldu ürəklərdə ta qəm-qəhər, bayramım,
Mənim zəfər bayramım!

Zəfər yazan uçaqlar havada havalandı,
Qurbaninin sədası göylərdə dalğalandı.
Yer üzündən yüksəlib səmalarda dolandı,
Göylərin göy qurşağı üç rəngıi bayrağım,
Mənim zəfər bayramım!

Tarixdə bir ilk oldu bu qələbə, bu zəfər,
Qəlblərə fərəh verir bu sevinc axşam, səhər.
Belə sevincə hələ qərq olmamışdır bəşər,
Tarix görməyib hələ buna bənzər bayramı,
Mənim zəfər bayramım!

Yerdə qalmadı qanı Mübarizin, Poladın,
Sevinclə əvəz oldu anaların fəryadı.
Bu gün Azərbaycanım dünyada bir dünyadı,
Yağıların ömrünə düsər, kəsər bayramım,
Mənim zəfər bayramım!

Ərənlərim hey qeyrət səngərində yatdılar,
Vuruşub gecə-gündüz arzu-kama çatdılar.
Neçələri rütbəyə, ada-sana çatdılar.
Kişiliyə, ərliyə verdi dəyər bayramım,
Mənim zəfər bayramım!

10.12.2020 

Dalidag.az