Xəbər verdiyimiz kimi prezident İlham Əliyev 17 oktyabr 2020 -ci il tarixdə Azərbaycan ordusunun Xüsusi Təyinatlı Qüvvələrinin komandiri, general-mayor Hikmət İzzət oğlu Mirzəyevə general-leytenant ali hərbi rütbəsinin verilməsi haqqında Sərəncam imzalamışdır. ADPU-nin dosenti Mirvari Verdiyeva bu münasibətlə general-leytenant H.Mirzəyevi təbrik edib. O duyğularını sözə çevirib, təbrikini şeir dilində ünvanlayıb.

Dalidag.az həmin şeiri oxuculara təqdim edir:
 
XÜSUSİ TƏYİNATLI

Xüsusi təyinatım var...
İgidəm, gözə görünməz!
Cəbhə zolağın yarıram,
Ayaq səsim eşidilməz.
Düşməni boğub yataqda,
Geriyə dönərəm dinməz.
Yurdum azad olsun deyə,
Adətə sadiq qalıram!
Qisasa-qisas alıram!

Xüsusi təyinatım var...
Qatlamıram diz, keçirəm.
Mənim üçün fərqi yoxdur,
Dərə, təpə, düz keçirəm.
Qərargahları dağıdıb,
Qoymuram bir iz, keçirəm.
Hara ayaq basıramsa,
O yerdə zəfər çalıram.
Qisasa-qisas alıram!

Xüsusi təyinatım var...
Yağılardan öc alıram.
Qəfləti zərbə endirib,
Qəsbkardan bac alıram.
Mən bu torpağın oğluyam,
Torpağımdan güc alıram.
Qan tökənə qan uddurub, 
Aralığa qan salıram!
Qisasa-qisas alıram!

Xüsusi təyinatım var...
Mənim üçün sərhəd yoxdur.
Yurdum qanla suvarılıb,
Soracaq hesabım çoxdur.
Qəlblərə qorxu salmışam,
Adım düşmən üçün oxdu!
Əzrayılam sizin üçün,
Ölüm təbilin çalıram.
Qisasa-qisas alıram!

Xüsusi təyinatım var...
Məndən aman gözləməyin!
Tanrının vuran əliyəm,
Radarları izləməyin!
Təşkilatlara hay salıb,
Yazıq-yazıq sızlamayın!
Yaradan hökmün oxuyub,
Rəbbimə sadiq qalıram!
Qisasa-qisas alıram!  
















Mirvari Verdiyeva 
Dalidag.az