Evdən uzaq

Bir evim var, günəş doğan,
Ay süzülən tərəfdədir.
Yolunu tapa bilmirəm,
Yollardayam bir həftədir.

Bir balaca həyəti var,
Həyətində çiçəkləri.
Qoca söyüd ağacıdı,
Üstü arı pətəkləri.

Gecələri ay götürüb,
Ulduzları düşür gölə.
Qurbağalar nəğmələşir,
Nəğmələr can tapır belə.

Buram-buram külək əsir,
Gecənin tən yarısında.
Balaca bir kirpi gəzir
Çiçəklərin arasında.

Uzanıram çəmən üstə,
Xəyallara dala-dala.
Bir qarışqa yük daşıyır,
Sinəm üstə bala-bala.

Tanrım, axı hardayam mən?
Quşlar ötmür bir həftədir.
Bir evim var, əgər ötsə,
Quşlar ötən tərəfdədir.

Əli Rüzgar