Bu gün Şərqi Zəngəzur Regional Mədəniyyət İdarəsinə tabeli Kəlbəcər rayon Mərkəzləşdirilmiş Kitabxana Sisteminin Bağırlı, Günəşli, Çaykənd, Balaca İstisu, Tövlədərəsi, Dalqılınclı, Laçın, Cəmilli, Tatlar, Güneypəyə, Alçalı, Şaplar və Əsirlik kənd kitabxana filiallarının birgə təşkilatçılığı ilə Aşıq Şəmşir adına Mədəniyyət Evində 28 May – Müstəqillik Gününə həsr olunmuş “Şanlı tariximizin parlaq səhifəsi – 28 May” adlı tədbir keçirilib. 

Dalidag.az xəbər verir ki, tədbir Azərbaycan Respublikasının Dövlət Himninin əzəmətli sədaları altında başlamış, ardından Vətənimizin azadlığı və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Çıxış edən kitabxana əməkdaşları 28 May tarixinin Azərbaycan xalqının taleyində mühüm yer tutduğunu vurğulayaraq, 1918-ci ildə qurulan Azərbaycan Xalq Cümhuriyyətinin Şərqdə ilk demokratik respublika kimi tarixə düşdüyünü qeyd ediblər. Onlar müstəqilliyimizin qorunub saxlanılmasının və gələcək nəsillərə çatdırılmasının hər bir vətəndaşın müqəddəs borcu olduğunu bildiriblər.

Tədbir bədii hissə ilə davam edib. Məktəblilər və fəal oxucular tərəfindən vətənpərvərlik mövzusunda şeirlər səsləndirilmiş, Azərbaycanın qəhrəmanlıq tarixini və dövlət müstəqilliyini tərənnüm edən musiqilər ifa olunmuşdur. İştirakçılar tərəfindən təqdim edilən mahnılar tədbirə xüsusi ruh və coşqu qatmış, dinləyicilər tərəfindən böyük maraq və alqışlarla qarşılanmışdır. Tədbirdə saz ustalarının ifasında milli musiqilər və aşıq havaları səsləndirilib.
Sonda tədbir iştirakçıları belə əlamətdar günlərin gənc nəslin vətənpərvərlik ruhunda formalaşmasında mühüm rol oynadığını vurğulayıb, 28 May – Müstəqillik Gününün xalqımızın qürur və şərəf tarixi olduğu qeyd ediblər.

Dalidag.az