Deputat Aqil Məmmədov parlamentin dünən keçirilən iclasında işğaldan azad edilən Kəlbəcər rayonuna mövsümü köçürülən təsərrüfatla bağlı məsələyə toxunub. 

Aqil Məmmədov bildirib ki, "seçicilərlə görüşlərdə qaldırılan məsələlər içərisində daha çox arıçılıq və qoyunçuluq təsərrüfatlarının işğaldan azad edilmiş Kəlbəcər rayonu ərazisinə buraxılması istənilir. Keçən il də, bu il də təsərrüfatların rayon ərazisinə buraxılması üçün xüsusi kvota müəyyən edilib. Bu arı ailəsi sayına və qoyun təsərrüfatında qoyun sayına əsasən müəyyən edilir. Kvotanın tələbinə cavab verməyən, yəni nisbətən az arı ailəsi və qoyun sürüsü olan təsərrüfatlar bu imkandan kənarda qalırlar.

Bu baxımdan, mən müvafiq qurumlara, o cümlədən, Kənd Təsərrüfatı Nazirliyinə təklif edərdim, hər iki təsərrüfat üzrə kvotanı aşağı salsınlar ki, daha çox təsərrüfatlar Kəlbəcər torpaqlarının bərəkətindən yararlana bilsinlər.  
Əlbəttə, burada əsas diqqət əhalinin təhlükəsizliyi ilə bağlıdır. Mina partlaması nəticəsində bədbəxt hadisələr bu gün də yaşanır. Ərazilərin minalardan təmizlənməsi işi hesab edirəm ki, Kəlbəcər rayonu ərazisində də geniş şəkildə aparılmalıdır. Bu, həm orada xidmət keçən hərbçilərimizin, həm də ərazidə çalışan, işləyən vətəndaşlarımızın təhlükəsizliyi, həmçinin, böyük qayıdışın sürətləməsi üçün əhəmiyyətlidir", - deyə o bildirib.

Nigar Nəriman
Dalidag.az