Müharibənin bitməsindən bir ildən artıq vaxt ötməsinə baxmayaraq, bir sıra problemlər hələ də həllini tapmamış qalır. Maddi yoxluqlar, sosial çatışmazlıqlar zamanla bərpa olunsa da, mənəvi ağrıları sağaltmaq çox çətindir. Döyüşdə travma alıb, sonradan intihar edərək, şəhid kimi dəfn olunan, ancaq şəhid statusu verilməyən bir əsgərin ailəsini ovundurmaq, təsəlli etmək daha da çətindir. Söhbət əslən Kəlbəcərin Zəylik kəndindən olan əsgər Vüsal Musayevdən gedir. Vüsal müddətdən artıq həqiqi hərbi xidmətdə olub. Döyüş yoluna Kəlbəcər istiqamətində başlayan V.Musayev Talış kəndi yaxınlığında gərgin döyüşlər nəticəsində yaralanıb və ağır kəllə-beyin travması alıb. 35 yaşlı qazi 2020-ci ilin dekabrın 7-dən Silahlı Qüvvələrin Baş Klinik Hospitalının Psixiatriya bölməsində psixoz diaqnozu ilə müalicə alıb və 2021-ci il yanvarın 6-da intihar edib. Şəhid kimi dəfn olunsa da bu günə qədər şəhid statusu almayıb.
Qeyd edək ki, müharibədən sonra "Cəsur döyüşçü" medalı alan Vüsal Musayev Goranboy rayonunda dəfn edilib. Şəhidimizin 2 azyaşlı körpəsi var.
Vüsal Musayevə şəhid statusu verilməməsi bir çox həmyerliləri kimi, Vətən müharibəsi qazisi, müəllim-şair Eyvaz Əyyubu da narahat edir. O bu məsələyə açıq şəkildə etirazını bildirib.
Dalidag.az E.Əyyubun məsələ ilə bağlı fikirlərini təqdim edir:

"Bir məsələ haqqında danışacam və bundan sonra kimin mənim haqqımda necə düşünməyi zərrə qədər önəmli deyil. 
Deməli, 2-ci Qarabağ müharibəsi dönəmində Vüsal Musayev adlı şəxs kəllə-beyin travması almış, öz yaddaşını itirmiş və psixoloji problemləri yaranmışdı. Bakı hərbi hospitalında müalicə alanda intihar edərək dünyasını dəyişib. Vüsalı dəfn edəndə şəhid olaraq dəfn edildi, millət vəkili, icra hakimiyyətinin məsul işçiləri iştirak etdi və Vüsalı 2-ci Qarabağ müharibəsi şəhidi olaraq son mənzilə yola salındı. İndi isə Vüsala şəhid adı verilmir, niyə?
Hal-hazırda bu məsələyə vəkil Əziz Qənbərov baxır və şəhid statusu almaq üçün nə qədər faktlar ortaya qoysa da, təsdiq olunmur. 
Əziz insanlar, biri mənə izah etsin ki, Vüsal yer əkəndə, ya qoyuna gedəndə, ya yolla gedəndə travma alıb? Bu adamın ruhu bizi - bu məsələyə ötəri baxanları bağışlayacaqmı?!
Vüsal MAHXHQ-su idi və səfərbərlikdən belə çağırılmamışdı, xidməti vəzifəsini yerinə yetirərkən Suqovuşan istiqamətində yaralanmışdı. 
Bu gün Vüsala şəhid statusu verilməməsi, sözün əsl mənasında, mənim vətənpərvərlik hissimi öldürür. Mən bir müəllim olaraq daha şagirdlərimə hansı vətənpərvərlik hissini aşılayım? Nə deyim şagirdə? Deyim ki, vətən uğrunda şəhid olan övlada şəhidlik statusu verilmir, ay bala?! Beləmi deyim? Ya ona çağırış gələndə deyim ki, get pulunu ver, özünü tərxis elə? 
Vüsal şəhid deyildisə, bu bayraq niyə atasına verildi? Şəhid deyildisə, niyə son mənzilə yola salınanda yayılım atəşi açılırdı?? 
Bu vətəni kasıbların balası qoruyur, məmurlar isə çapıb talayır".

Dalidag.az