Sürücülüyü yaxşı bacardığına görə Kənan Tofiqli noyabrın 10-dan sonra Qubadlı- Laçın istiqamətlərində xidmətə göndərildi. Son dayanacaq yeri Laçının Qarıqışlaq kəndi oldu. Söhbət edərkən Kənandan "Xidmətdə olduğun zaman ən çox nədən ötrü darıxırdın?"- deyə soruşduqda gülümsəyərək "Qızlarım İlknur və Aynur üçün darıxırdım. Hər dəfə telefonla danışanda ağlayırdılar, məni evə çağırırdılar" cavabını verdi. İndi Kənan Tofiqli qalib ordunun qalib əsgəri kimi ehtiyata buraxılıb. Söhbətimiz zamanı təltifinin olub-olmamasını soruşduq. Yenidən gülümsəyərək, bildirdi ki, nədənsə, mənim adım həmin siyahıda yoxdur. Hərbi biletini cibindən çıxarıb bizə göstərdi. Hərbi biletin müvafiq səhifəsində Suqovuşan və Talış istiqamətlərində döyüşlərdə iştirak etməsi barədə hərbi hissənin möhürü ilə təsdiqlənmiş qeyd var idi. Elə bizim yanımızdaca hərbi hissənin təltiflərin verilməsi ilə məşgul olan əməkdaşına zəng vurdu. Yaxın günlərdə ona müsbət cavab veriləcəyini bildirdilər. Biz də inanırıq ki, hərbi hissələrdə döyüşmüş vətəndaşlarımızın təltiflərinin gecikdirilməməsi üçün məsul olan hərbi hissə əməkdaşları  operativ iş apararaq keçmiş döyüşçülərin məmnunluğunu təmin edəcəklər. Çünki qalib əsgəri get-gələ salmaq qalib ordunun adına yaraşmaz. Biz hər birimiz Qalib Ordunun qalib əsgərlərinin qayğılarını çəkməyə borcluyuq.