İşğal altında olan Qarabağ, Kəlbəcər və Laçın ictimaiyyətini təmsil edən bir neçə İctimai Birlik  prezidentə müraciət ünvanlayıb.

Dalidag.az müraciətin mətnini təqdim edir:

"Azərbaycan Respublikasının Prezidenti,

Azərbaycan Silahlı Qüvvələrin Ali Baş Komandanı

İlham Əliyev cənablarına

Hörmətli cənab Prezident, Silahlı Qüvvələrinin Ali Baş Komandanı, Azərbaycanın Qarabağ ərazisinin və ətraf rayonların erməni silahlı qüvvələri tərəfindən işğalından 30 ilə yaxın vaxt keçir. Azərbaycan torpaqlarının qeyd-şərtsiz azad olunması ilə bağlı BMT Təhlükəsizlik Şurasının məlum dörd qətnaməsinin, beynəlxalq təşkilatların çoxsaylı qərar və sənədlərinin olmasına baxmayaraq Ermənistan bu çağırışları illərdir ki, qulaqardına vurararaq işğal aktını davam etdirir. ATƏT-in Minsk qrupunun həmsədrlərinin münaqişənin dinc yolla həll edilməsi ilə bağlı illərdən bəri apardığı saysız-hesabsız görüşlər də heç bir nəticə vermir. Sizin dəfələrlə erməni rəhbərliyinə çağırışlarınız da qarşı tərəfdən reallıqla qiymətləndirilmək əvəzinə, riyakarcasına şantaj olunur. Əvəzində isə erməni rəsmilərinin Azərbaycana qarşı yeni sərsəm torpaq iddiaları ortaya atılır. Ermənistanda hakimiyyətlər dəyişsə də Azərbaycan torpaqlarının işğalda saxlanılmasına münasibət dəyişmir.
Cənab Ali Baş Komandan, Sizin dəfələrlə açıq mətnlə qeyd etdiyiniz kimi bu günkü Ermənistan adlanan dövlət Azərbaycan torpaqları hesabına yaradılıb. “Gülüstan” və “Türkmənçay” müqavilələrindən sonra torpaqlarımızın parçalanması, xarici dövlətlərdən ermənilərin kütləvi şəkildə torpaqlarımıza köçürülməsi və Azərbaycan torpaqlarında Ermənistan adlı qurama bir dövlətin yaradılması erməni şovinizmini daha da şirnikləndirib. Son illər ermənilərin Yuxarı Qarabağda və işğal olunmuş yeddi rayonumuzda geniş məskunlaşdırma və tikinti işləri aparması düşmən dövlətin torpaqlarımızı heç bir şəkildə azad etmək fikrində olmadığından xəbər verir. Azərbaycanla Ermənistan arasında davam edən bu münaqişənin sülh yolu ilə həllini üzərinə götürmüş ATƏT-in Minsk qrupunun uzun illərdən bəri ikibaşlı mövqeyi və susqunluğu isə bu qurumun mənəvi iflasından xəbər verir.
Cənab Prezident, biz Qarabağdan və ətraf rayonlardan olan bir milyondan artıq məcburu köçkün də ölkəmizin siyasi rəhbərliyi kimi bu duruma dözmək və işğalla barışmaq fikrində deyilik. Yeddidən yetmişədək hər bir məcburi köçkün xalqımızın bu haqq savaşında dövlətimizin və ordumizun arxasında müsəlləh əsgər olaraq dayanmağa hazırdır. Torpaqlarımızın silah gücünə azad olunmasına ölkəmizin Konstitusuyası və bütün beynəlxalq hüquqi sənədlər tam əsas verir. Yetər ki, nəhəyət, döyüş əmri verəsiniz. Tanrı dövlətimizi və millətimizi qorusun.  

“Qarabağa Qayıdış” İctima Birliyi,
“Kəlbəcər Yolu” İctimai Birliyi,
“Kəlbəcərə qayıdış” İctima Birliyi,
“Laçına doğru” İctimai Birliyi"

Dalidag.az