Qarabağ müharibəsi vurduğu zərbələrlə yanaşı, onu da göstərdi ki, bizim xalqın qəhrəmanlıq əzmi dastanlarda, nağıllarda qalmayıb. O cəsur soy-kök var və olacaq. Bunu şəhidlik zirvəsinə ucalan oğul və qızlarımız öz şücaətləri ilə sübut etdilər. Bütöv Azərbaycanın cəlb olunduğu müharibədə Kəlbəcər də az şəhid verməyib. Onlardan biri də Zahid Musayevdir. Bu gün onun anım günüdür. Ruhu şad olsun!
Dalidag.az bildirir ki, Zahid Daşqın oğlu Musayev 1974-cü il noyabr ayının 10-da Kəlbəcər rayonunun Mərcimək kəndində anadan olub. 1993-cü ildə Həqiqi-hərbi xidmətə çağırılıb. Kəlbəcər rayon Hərbi komissarlığının çağırışı ilə xidmətə yola düşən əsgər Fizuli-Ağdam istiqamətində gedən döyüşlərdə dəfələrlə igidlik göstərir. 1996-cı il may ayının 18-dən 19-na keçən gecə düşmənin kəşviyyat diversiya dəstəsinin hücumunu aşkarlayaraq, qeyri-bərabər döyüşə atılır. Düşmənin bir neçə canlı qüvvəsini məhv edir, dəstənin mövqelərimizə yaxın düşməsinə imkan vermir. Xain düşmənin atdığı əl qumbarasına tuş gəlsə də, yaralı Zahid sonacan vuruşur. Sonda kömək gəlməsinə baxmayaraq, aldığı yaralar onun həyatına son qoyur. Beləliklə, Zahid Musayev şəhidlik zirvəsinə ucalır.

Qeyd edək ki, Zahid Musayev 2005-ci ildə ölkə başçısının 859 nömrəli sərəncamı ilə “AZƏRBAYCAN BAYRAĞI” ordeni ilə təltif olunub.

Sevinc Qərib
Dalidag.az