İlham Məmmədli

Dalidag.az Sevinc Qəribin təqdimatında İlham Məmmədlinin şeirlərini təqdim edir:

Taparsan 

Nərgizi yamacda, zanbağı suda, 
Al yanaq laləni düzdə taparsan.
Bənövşə gizlənər kolun dalında,
Qanqalı hər yolda-izdə taparsan. 

Tanrı öz qələmin çəkib güllərə,
Adları yayılıb, düşüb dillərə.
Hər biri yaraşar incə əllərə,
Qönçə zərifliyin üzdə taparsan.

Güllər ki, yazılıb bahar baxtında
Elə qönçə tutub açar vaxtında.
Qızılgül oturar şahlıq taxtında 
Maralçiçəyini yazda taparsan. 

Səni dağa-daşa salar gəncliyin,
Ağlını əlindən alar gəncliyin,
Dəli bir sevdaya salar gəncliyin,
Dincliyi bir şəhla gözdə taparsan. 

Yurdda hüzur olmaz şən olmayanda,
Dağı xəzan vurar çən olmayanda.
Bir gün bu dünyada mən olmayanda
Axtarsan İlhamı, sözdə taparsan. 

Yurdum, azad olan çağını sevdim 
Çıxdınız 

“Üzünüz ağ olsun”, qayğılı günlər,
Bu yola mənimlə qoşa çıxdınız.
Bəlkə üzünüzə xoş baxdığımdan
Çiynimə dırmaşıb başa çıxdınız. 

Həyat yollarımda sirdaş oldunuz,
Sarılıb boynuma qardaş oldunuz.
Hara ayaq basdım, yoldaş oldunuz,
Gör gəlib hansı bir yaşa çıxdınız? 

Ürəyimdən neçə damar çəkdiniz,
Hər gün saçlarıma tumar çəkdiniz,
Başıma qırovu hamar çəkdiniz,
Saqqalı ağardıb qaşa çıxdınız. 

Gördüm bu dünyanın az ləzzətini,
Nə yedim, nə daddım qaz ləzzətini.
Qismətimə düşən yaz ləzzətini,
Payızdan ötürüb qışa çıxdınız. 

Nə qədər lazımdı ərk elədiniz,
Vallah, qayğılarla görk elədiniz.
Gör nə vaxt siz məni tərk elədiniz,
Ağlımı tükədib, huşa çıxdınız. 

Heç mən də sizlərdən qopa bilmədim,
Qayğısız bir günü tapa bilmədim.
Elə öyrəşdim ki, ata bilmədim,
Mənimlə bu ömrü başa çıxdınız. 

İlhamın yaxasın tanıyan gündən
Onu çıxardınız çilədən, dindən.
Elə cilvələnib, dolanıb gendən
Hər yerdə qənşərə, tuşa çıxdınız.

Hey 

Kərəm kimi kül olmağa nə var ki,
Aşiq odur ömrü boyu yana, hey!
Yar yolunda zərrə-zərrə əriyə,
Eşq əzabın dərman bilə cana, hey! 

Məcnun kimi qul adına satıla,
Novruz təki dəryalara atıla.
Diri-diri atəşlərə çatıla,
Varlığını yar adında dana, hey! 

Lələ olub zirvələrə çəkilə,
Daş komada çən-dumana bükülə,
Yağış olub eşq bağına tökülə,
Gül ləçəyin yar yanağı sana, hey! 

Bülbül kimi gül şehinə boyana,
Qurbani tək yar bağında oyana.
Abbas olub zülm önündə dayana,
Eşq yolunda ömrün vura sona, hey! 

İlham, sevgi bir sınaqdı əzəldən,
Gənclik gedir, heyif, çıxır tez əldən.
Kim doyar ki, bir əhli-hal gözəldən,
İstəyini baxışından qana, hey!

Dalidag.az