Ata yurdu Kəlbəcəri görməmişdi. Gözəlliklər diyarı olan bu  məkan haqqında valideynlərinin danışığından  eşitmiş və oranı görməyi çox arzulamışdı. Şanlı Azərbaycan Ordusu  torpaqlarımızı düşməndən azad etdikdən sonra  dəfələrlə Kəlbəcərə getmək,oranın gözəlliklərini öz gözləri ilə görmək istəmişdi.   Lakin oraya ancaq  təsərrüfatı olan vətəndaşların getməyinə icazə verirdilər.    Həyat yoldaşı, Başlıbel kənd sakini ,1993-cü il təvəllüdlü  Həşimov Faiq Fərhad oğlu  təsərrüfatındakı mal-qaranı  bu yay Kəlbəcər yaylaqlarına köçürəcəyi fikrini evdə ona deyəndə çox sevindi.  Ömür boyu arzuladığı  dağlar gözəli Kəlbəcəri görəcəyini biləndə sevindi. Nə biləydi ki , doğma anası qədər sevdiyi Kəlbəcərdə özü də ana olacaqdı...
Başlıbel kənd sakini,  2002-ci il təvəllüdlü Həşimova Fatimə Sahib qızı ömür boyu görməyi arzuladığı  ana yurdu Başlıbelə iki gün bundan qabaq gəlmişdi.  Anası qədər sevdiyi  bu diyar onun üçün  çox əziz idi.  Hələ uşaq yaşlarından atası Sahibin Kəlbəcərin təbiəti ,iqlimi , əhalinin yaşayış tərzi haqqında  danışdığı söhbətlər heç zaman Fatimənin yadından çıxmazdı. İndi doğma Vətənə qovuşduğu üçün  dəfələrlə “Allaha şükür!” kəlməsini dilinə gətirərək şəhidlərimizin ruhuna dualar oxudu.  Əyilib düşmən tərəfindən viran edilmiş doğma kəndinin torpağından öpdü.  Doğma kəndində  qaldığı bu iki gündə  ətrafdakı dağlara ,  yaşadıqları alaçığın beş metrliyindən keçən  Başlıbel  çayına heyranlıqla baxırdı. Çayın şırıltısı ona ana laylası kimi doğma gəlirdi. Sanki , dunyaya göz açandan bəri elə burada yaşamışdı...
  ...Birdən bətnindəki körpənin çırpındığını hiss etdi.  “Deyəsən, kəndimizin gözəl təbiətini bu da görmək istəyir “-deyə ürəyində fikirləşdi.  Lakin yavaş-yavaş ağrılar şiddətlənməyə başladı.  Qaynanası Validə xanıma  ağrıları barədə deyəndə  qadın heyrətləndi. “Ay bala ,burada həkim yox , bir şey  yox ,sən  nə danışırsan ? ”- deyə, Validə xanım təşvişlə bildirdi. Əlacı yalnız yaxınlıqda yaşayan Kamandarı çağırmağa çatdı. Kamandar məsələni bilən kimi maşını onların qapısının ağzına sürdü.  Validə xanım gəlini ilə maşına əyləşdilər. Kamandar maşını işə salaraq  kəndin çıxışına yaxın  mədəniyyət evinin həyətindəki çadırda yaşayan  Saməddin müəllimgilin  qapısında saxladı.  Kamandar bilirdi ki , Saməddin müəllimin həyat yoldaşı Tamella xanım  tibb bacısı işləyib.
Məmmədova Tamella Rəşid qızı 1992-ci ilin fevralında açılışı olan Başlıbel kənd xəstəxanasında ilk işə götürülən ixtisaslı tibb bacılarından idi.  Tamellanın qayınanası Həqiqət xanım onları tək buraxmadı, ”Mən də sizinlə gedirəm”-dedi.  Kamandar maşını bacardığı qədər sürətlə sürməyə çalışırdı.  Lakin kələ-kötür dağ yollarında “Jiquli” markalı maşını sürməyin çətinliyini  hamı yaxşı bilir.  Təcili yardım maşını  çağırmaqlarına baxmayaraq Kəlbəcərin ən ucqar kəndi olan Başlıbelə ən yaxın təcili yardım stansiyası Tərtər şəhərində olduğundan onun Kəlbəcərə gəlməsi hələ xeyli çəkəcəkdi. Odur ki , Kamandar 12 kilometrlik kələ-kötür dağ yolunu başa vurub  Bəylikdən keçən Laçın-Kəlbəcər yoluna  çıxan kimi maşının qəza işıqlarını işə salıb sürəti  artırdı.  
Tuneli keçəndən bir az sonra  Tamella  Kamandara maşını yolun kənarına verib saxlamasını və maşından düşməsini xahiş elədi.  Artıq doğuş başlamışdı. Tamella Həqiqət xanımın köməyi ilə Kəlbəcərdə ilk doğulan körpənin dünyaya gəlməsində əllərindən gələn köməyi etdilər.  Bir qədər keçəndən sonra maşından xeyli aralıda dayanıb siqaret çəkən Kamandar maşından gələn  körpə səsini eşidəndə əllərini göyə qaldırıb  Allaha şükür etdi.  Bayaqdan bəri dəfələrlə zəng etdiyi təcili yardım əməkdaşlarına bir də zəng edib artıq uşağın dünyaya gəldiyini bildirəndə tibb işçiləri  Çərəkdar kəndinə girdiklərini bildirdilət.  Aradan bir neçə dəqiqə keçəndən sonra  təcili yardım maşını onların yanında saxladı...
24 iyun 2025-ci ildə baş verən bu hadisə  İşğaldan azad olunan  Başlıbeldə ilk  körpənin dünyaya gəlməsi hadisəsi idi. Həqiqət Məmmədovanın, Tamella Məmmədovanın və Kamandar Məmmədovun fədakarlığı nəticəsində bir gənc ananın və onun körpəsinin həyatı xilas oldu.Təqdirəlayiq haldır ki , gənc ana Fatimə Həşimova  doğma torpağa , elə bağlılığını bir daha nümayiş etdirərək yeni doğulmuş uşağını qucağına alaraq bir neçə gündən sonra  yenidən Başlıbelə  qayıtmış və  təsərrüfatla məşğul olan həyat yoldaşı Faiqə dəstək olmuşdur. Bəzən yenicə doğulmuş körpəsini qucağına alaraq  dörd yaşlı oğlinun əlindən tutub  örüşdən gələn heyvanın qarşısına çıxır və onların yerbəyer olunmasında həyat yoldaşına kömək edirdi.  Müvəqqəti məskunlaşdıqları Bərdə rayonunun Mirzalıbəyli kəndindəki  Subartezian Quyuları İdarəsinin binasında da beləcə həyat yoldaşının təsərrüfat işlərinə  köməyini əsirgəmirdi. Söhbət zamanı gənc valideynlər  əlaqədar təşkilatlardan  onların yaşayış şəraitlərinin yaxşılaşdırılmasını və evlə təmin olunmasını  xahiş etdilər. 
 
   Oqtay Salahlı  
      Dalidag.az