Əlövsət Saldaş

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Əlövsət Saldaş yaradıcılığından: 

ADAM

Sənnən ki Tanrının xəbəri yoxdur,
Kim səni dünyaya göndərib, adam.
Sahibsiz qəriblə dünya doludur,
Dön qayıt geriyə, dön, qərib adam.

Pəsdə inləyirsən, bəm oxuyursan,
İslaq görünürsən, nəm oxuyursan,
Elə dərd çalırsan, qəm oxuyursan,
Vaxt səni nə yaman dindirib, adam.

Köklə qopuzunu Qorquddan denən,
Darda tapındığın boz qurddan denən,
O dağlardan oxu, o yurddan denən,
Könlünü kamana döndərib, adam.

Bu elə atəşdir yan durmaq olmur,
Göynədir - yetənə qandırmaq olmur.
Şamını təzədən yandırmaq olmur,
Zalımlar biryolluq söndürüb, adam.

Əlövsət, kölgə tək ötək dünyadan,
Sevinci, nəşəsi gödək dünyadan...
Tutuşaq əl - ələ, gedək dünyadan
Sən qərib adamla mən qərib adam.

Dalidag.az