Günlər güllə kimi keçir...
Bunu uşaqkən böyüklərdən eşidərdik, sonralar bəzən qayğılar-qarğaşalar vaxtımıza dov gələndə özümüz də belə deyirdik.
Bəlkə, bu, həyata keçirə bilmədiyimiz istəklərimizin qarşısinda bir məğlubiyyət etirafıdır?! Bəlkə də, həmin güllələr ürəklərimizi dəlib keçən sənin yoxluğun kimi acılardan açılmış dəliklərdir?!... Bəlkə də...
Bugünkü başlıq acısı dillə ifadəsi çətin olan yarımçıq arzularımın qarşısında məğlubiyyət etirafıdır.
Ən yarımçıq qalan sənin 40 gün əvvəl bu fani dünyaya "uf" da demədən biryolluq gözlərini yummağın, yarıda bitirdiyin ömrün oldu. Ermənilər tərəfindən qətlə yetirilmiş nənənin qalıqlarını tapmaq əvəzinə, 30 illik həsrətdən sona Başlıbeldə dünyaya göz yuman şəhid kimi sevənlərinin, doğmalarının ürəklərinə dağ basdın...Hələ mənə şəhid dayımın qalıqlarını da hökmən  tapacağına söz vermişdin...
Uşaqkən inadkardın, böyüdükcə təvazökarlıq, səmimiyyət, insaniyyət, sədaqət...kimi üstün keyfiyyətlərinlə seçilənlərdən oldun...Ona görə də sənin yoxluğun Başlıbelin itkisindən çıxıb Azərbaycan mediasının itkisinə çevrildi!...
İnanıram ki, yadigarların- oğlun Hüseynlə rəhbəri olduğün "Moderator.az" xatirəni bundan sonra da yaddaşlarda yaşadacaqlar.
Ruhun şad olsun!

Hüseyn Şahbəndəyev
Dalidag.az