Zaur Akifoğlu

...Mən kəndimizdən çıxanda çox gənc idim...
O səbəbdən də, nə kəndimizin, nə də kəndimizə qonşu kəndlərin- Zallar, Yanşaq, Binə, Qasım Binə, Bağırlı, Bağarsaq kəndlərinin adamlarının çoxu, ələlxüsus, gənclər yadımda qalmasa da, o ərazinin təbiəti, indi də, hər daşına, hər sısqa bulağına, gülünə, çiçəyinə, böcəyinə, sevdiyim, qoxusu heç vaxt burnumdan getməyən qan bənövşəyə qədər yaddaşımda kodlaşıb və ümidlərimdə yaşatdığım bir arzu ilə nə vaxtsa Kəlbəcərə qovuşmağımı da bilirəm. Nə fərqi, ya cismən ya ruhən. 
Kəlbəcər işğal olunanda mən Almanyada yaşayırdım. Ara sira eşirdiyim xəbərlər məni dəhşətə gətirirdi. Azərbaycanın ərazi baxımından ən böyük rayonu olan 60 000 min nəfərlik Kəlbəcər sakinləri, heç vaxt görmədiyim Murov yolunda,  qarın, çövğunun, ölümün içindən adlayaraq, bundan sonra yaşayacaq qaçqın, köçkün ömürlərini, sanki, içərimdən keçib gedirdilər...
Beləliklə, mən Bakıya qayıdnda, Kəlbəcər işğal altında idi və qohumlarım, tanıdığım insanlar pərən - pərən olmuşdular. Hər bir kəlbəcərli kimi, mən də Kəlbəcərdən yeniliklər axtarışında ikən, "Youtub" kanalında Kəlbəcər haqqında çoxlu videolar paylaşan bir adam diqqətimi cəlb elədi. Sanki o Kəlbəcərdən paylaşdığı videonlala, mən Kəlbəcərə gedib qayıdırdım.
Məlum oldu ki, bu gənc, kəlbəcərlidir və atası "Qasım binəsi" deyilən kənddəndir. Yuxararıda göstərdiyim kəndlər bir-birinə yaxın idi, demək olar ki, hamı bir-birinə qohum idi. Saydığım kəndlərin adamları bir biri ilə yaxın qohum olmasa da, kökü bir neçə yüzilliyə söykənən səcərə qohumu idilər. Sonrakı görüşlərimizdə o özü haqqında danışır:
Atası Akif müəllim, işi ilə əlaqədar olaraq, ailəsi ilə birlikdə Kəlbəcərin özündə yaşayır.
Ermənilər rayonu işğal edəndə, onun 17 yaşı var imiş. Atası eşidəndə ki, rayonda qarışıqlıqdı, ailəni kəndə- ata yurduna gətirir. Kənddə bircə nəfərin də olmadığını görüb, Murov yolu ilə, əvvəlcə Mingəçevirdə, sonra isə Bakıda məskunlaşırlar. Burda o, valideynlərini və bir çox doğmalarını vaxtsız itirir. Bir neçə ildən sonra, gənc oğlan anlayir ki geriyə- Kəlbəcərə dönüş yoxdur.
"Google"da axtatış verib, Kəlbəcər haqqında maraqlansa da, cəhdi boşa çıxır, heç bir məlumat ala bilmir. Yenidən "Google"də Kəlbəcərin adını erməni dilində yazanda, məlumatlar daxil olur və beləliklə, erməni dilindən tərcümədə Kəlbəcər haqqında çoxlu məlumatlar toplayıb, bacardığı qədər sosial şəbəkələr üzərindən dünyaya yayır. 44 günlük qələbəmizdən sonra, tez tez Kəlbəcərdə çəkilişlərdə olur və onun demək olar ki, hər kəndini, hər daşılmış evini, hər cığırını dronla və kamera ilə tarıxin yaddaşına köçürür, "Youtub"a yerləşdirir. Özü təsis etdiyi "Məskənim" layihəsinin rəhbəridir. Kəlbəcər onun üçün aldığı nəfəs, içdiyi su qədər əzizdir. 44 günlük Böyük qələbəmizdən sonra, doğma Kəlbəcərimizdə gedən quruculuq işlərini, 12, 3 km uzunluğunda olan, Murov dağının altından Göy göl rayonunun Toğanalı kəndindən, Kəlbəcərin Zallar kəndinə çəkilən tuneli, Kəlbəcər gözəlliklərini dünyaya çatdırır. Onun arzusu Kəlbəcərdə yaşayıb yaratmaqdır.
Qoy arzuları çin olsun. 
17 - 47 yaş arasındakı məsafə uzunluğunun  zaman tunelindən kecən bu adamla tanış olaq:
Bu təvəzökar adam Zaur Akifoğludur.
Bu adı "Youtub"a yazsanız, Kəlbəcərin bütün gözəlliklərini, bununla bərabər, erməni vandallarının etdikləri vəhşiliklərin bir daha şahıdi olacaqsınız.
Sizə işlərinizdə uğurlar arzulayıram, Vətən fədaisi, yurd daşı!

Nuridə Misir 
30 aprel 2023
Dalidag.az
                       Nuridə Misir, Zaur Akifoğlu