Elxan Salahov


Araşdırmaçı jurnalist, Başlıbel faciəsindən bəhs edən “Qanlı kaha” kitabının müəllifi Elxan Salahov aprel ayında 30-cu ildönümü tamam olacaq kütləvi qətliamın xaricdə tanıdılması ilə bağlı vətəndaş cəmiyyəti institutlarına müraciət edib.  

Dalidag.az xəbər verir ki, Elxan Salahov şəxsi “Facebook” səhifəsində bu barədə yazıb: “Başlıbel faciəsinin beynəlxalq aləmdə tanıdılması üçün unikal imkan yaranıb. QHT-lərə Dövlət Dəstəyi Agentliyinin 2023-cü il üçün elan etdiyi kiçik qrantlar müsabiqəsinin mövzulardan biri "Başlıbel faciəsinin 30-cu ildönümü bağlı ölkə xaricində (Avropa ölkələri, Amerika Birləşmiş Ştatları, Kanada, Çin, Yaponiya) tədbirlərin təşkili" barədədir. Ermənistanın müharibə cinayətlərinin bariz nümunəsi olan bu faciə ilə əlimizdə kifayət qədər məlumatlar var.  Xarici ölkələrdə bu cür tədbirlər təşkil etmək təcrübəsi olan QHT rəhbərlərindən xahiş edirəm ki, bu mövzunu mümkün qədər diqqətdə saxlasınlar.  

Məlumat üçün bildirirəm ki, Başlıbel faciəsi ilə bağlı bütün həqiqətləri ən kiçik detallarına qədər  araşdırıb ortaya çıxarmışam, "Qanlı kaha" kitabı həmin faciədən bəhs edir, ssenari müəllifi olduğum "Başlıbel: mühasirə gündəliyi" adlı 4 hissəli sənədli film ötən ilin oktyabr-noyabr aylrında AZTV-də yayımlanıb. Yəni, Başlıbel faciə ilə bağlı əlimizdə kifayət qədər məlumatlar var və mən bu mövzunu işləyəcək QHT-lərə təmənnasız kömək etməyə hazıram! Yetər ki, Ermənistanın müharibə cinayətlərinin bariz nümunəsi olan Başlıbel faciəsini ölkə daxilində olduğu kimi, xaricdə də tanıda bilək”. Xatırladaq ki, 1993-cü ildə Kəlbəcərin işğalı zamanı Başlıbel kəndində 76 sakin son anda evini tərk edə bilməyərək mühasirə vəziyyətində qalıb. Onlardan 14 nəfəri aprelin 2-də qarlı dağ aşırımlarından keçməklə mühasirədən çıxmaq istəyərkən yolda qətlə yetirilib və ya girov götürülüb. Digər 62 nəfər isə kəndin yaxınlığındakı kahalara sığınaraq mühasirə həyatını davam edib. 113 gün çəkən mühasirə zamanı dəfələrlə erməni silahlılarının hücumuna məruz qalan dinc sakinlərdən 14 nəfəri girov götürülüb, 18 nəfəri qətlə yetirilib, 1 nəfəri itkin düşüb, 29 nəfər isə yalnız gecələr gizli dağ yolları ilə mühasirədən çıxa bilib. Ermənistan ordusunun Başlıbel kəndində köməksiz vəziyyətdə kahalara sığınmış əliyalın insanlara qarşı törətdiyi vəhşiliklər, evlərin yandırılması və talan edilməsi, bir gecədə 4 ailənin bütün üzvlərinin qətlə yetirilməsi Qarabağ müharibəsi dövrünün ən dəhşətli hadisələrindədir.

Dalidag.az