Kəlbəcər işğal olunanda Asimin cəmi bir yaşı vardı. İndi Kəlbəcər azaddı, yenidən dirçəlir. Bizlər isə böyük arzularla, sonsuz ümidlərlə Kəlbəcərə, doğma yurdumuza qayıtmağa köklənmişik!  

"Space" TV-nin təşkil etdiyi "Milli səs" musiqi yarışmasında 500 iddiaçı arasından seçilərək SMS-lə səsvermə mərhələsinə yüksəlmiş Asim Abbasov xalq musiqisi və milli estradanın təbliğində öz səsimiz ola bilər. O, həm də yarışmada Kəlbəcəri təmsil edən yeganə iştirakçıdır.  Doğma yurdlarımıza qayıdışdan sonra Asim bizlərə çox lazım olacaq. Ən azından 28 ilə yaxın davam edən işğal dövründə xalq musiqisi sahəsində itirdiklərimizin yerini qismən də olsa, doldurmaq üçün. Əminəm ki, Asim bu sahədə Kəlbəcərin layiqli təmsilçisi olmağa qadirdir! Onun yeganə gücü Tanrının bəxş etdiyi istedad və qabiliyyətidir. Biz də dəstək olaq ki, Asimi "Milli səs" yarışmasının qalibinə və Kəlbəcərimizin layiqli təmsilçisinə çevirə bilək!    

Asim Məhəmməd oğlu Abbasov Kəlbəcər rayonunun Başlıbel kəndindəndir. 

"Milli səs" yarışmasına məcburi köçkün kimi müvəqqəti məskunlaşdığı Bərdə rayonundan qatılıb. Ən böyük arzusu abad və firəvan Başlıbeldə "Qarabağ şikəstəsi" oxumaq, toy məclislərimizdə xanəndəlik etməkdir. Allah arzulara qovuşdursun, Asim! Sənin bu arzuların Başlıbel toylarının bəzəyi Aşıq İmran əminin ruhunu da şad edər, İnşallah! Binyamin və Natiq Cəfərovların layiqli davamçısı kimi elimizə-obamıza hörmət qazandıracağına da inanıram!