YAP Kəlbəcər rayon təşkilatı Yeni Azərbaycan Partiyasının 30 illiyinə həsr edilmiş "Zəfər Partiyası" adlı tədbir keçirib

21-11-2022 22:18


Yeni Azərbaycan Partiyasının (YAP) Kəlbəcər rayon təşkilatı YAP-ın təsis edilməsinin 30 illiyi münasibətilə Abşeron rayon Heydər Əliyev Mərkəzində “Zəfər Partiyası” adlı tədbir keçirib.
Tədbirdə rəqəmsəl inkişaf və nəqliyyat nazirinin müavini Cavid Qurbanov, Kəlbəcər Rayon İcra Hakimiyyətinin başçısı Azər Qocayev, YAP Kəlbəcər rayon təşkilatının sədri Həbib Misirov, Azərbaycan Respublikası Nazirlər Kabineti Aparatının məsul əməkdaşı Qurban Sadıqov, YAP Veteranlar Şurasının üzvü Şahlar Əsgərov, deputat Aqil Məmmədov, İqtisadi İslahatların Təhlili və Kommunikasiya Planlaşdırma və İnkişaf Departamentinin rəhbəri, iqtisad elmləri doktoru Aqil Əsədov və rayon ictimaiyyətinin nümayəndələri iştirak ediblər.
Dalidag.az xəbər verir ki, tədbir iştirakçıları rayon mərkəzində ulu öndər Heydər Əliyevin abidəsini ziyarət edib, önünə gül dəstələri qoyublar.
Tədbir ulu öndər Heydər Əliyevin və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Yeni Azərbaycan Partiyasının keçdiyi çətin və şərəfli yoldan bəhs edən videoçarx təqdim olunub.
Çıxış edən YAP Kəlbəcər rayon təşkilatının sədri Həbib Misirov qeyd edib ki, Azərbaycan dövləti və xalqımız əlamətdar bir hadisə ərəfəsindədir. Noyabrın 21-də ümummilli liderimiz Heydər Əliyevin qurucusu olduğu Yeni Azərbaycan Partiyasının yaranmasının 30 ili tamam olur. Yeni Azərbaycan Partiyası ötən əsrin 90-cı illərinin əvvəllərində zamanın tələbindən irəli gələrək Azərbaycan xalqının arzu və istəklərinin ifadəçisi kimi yaranmışdır. Həbib Misirov bildirib ki, Yeni Azərbaycan Partiyası yarandığı gündən siyasi səhnədə dövlətçilik mövqeyindən çıxış edərək xalqın mənafeyini hər şeydən üstün tutduğunu bəyan edib və qısa zaman kəsiyində ümumxalq rəğbətini qazanıb. Ümummilli lider Heydər Əliyevin qurucusu olduğu Yeni Azərbaycan Partiyası şərəfli inkişaf yolu keçərək bu gün Müzəffər Ali Baş Komandan, Prezident İlham Əliyevin rəhbərliyi ilə qələbələr, zəfərlər partiyasına çevrilib.
Təşkilat sədri vurğulayıb ki, bu günlərdə biz həm də böyük Zəfər nəticəsində öz doğma Kəlbəcərimizə qovuşmuşuq. Prezident İlham Əliyevin qətiyyəti, hərbi qələbəni həm də siyasi qələbəyə çevirən diplomatik məharəti nəticəsində Azərbaycan Ordusu olduqca çətin relyefə, sərt iqlimə malik olan Kəlbəcəri şəhid vermədən, bir güllə atmadan işğaldan azad etmişdir.
Tədbirdə çıxış edən rəqəmsəl inkişaf və nəqliyyat nazirinin müavini Cavid Qurbanov bildirib ki, Yeni Azərbaycan Partiyası Ulu Öndərin də dediyi kimi, bu günün, sabahın və gələcəyin partiyasıdır. Ümumxalq partiyası kimi tanınan Yeni Azərbaycan Partiyası artıq 30 ildir ki, respublikamızın ictimai-siyasi həyatında fəal iştirak edir, xalqın sevgisini və dəstəyini qazanır, ölkədə sabitliyin təminatında avanqard rolunu davam etdirir. Bu gün ölkəmizin aparıcı siyasi qüvvəsi olan Yeni Azərbaycan Partiyası nəinki regionda, eləcə də, beynəlxalq arenada özünün böyük nüfuzu ilə tanınan bir siyasi təşkilatdır. Ümummilli lider Heydər Əliyevin müəllifi olduğu Yeni Azərbaycan Partiyası hər zaman, qeyd-şərtsiz, qarşısına qoyulan vəzifələri yerinə yetirir.
YAP Veteranlar Şurasının üzvü Şahlar Əsgərov çıxış edərək, Yeni Azərbaycan Partiyasının yaranma tarixindən, keçdiyi mürəkkəb və şərəfli yoldan söhbət açıb. Əsası ulu öndər Heydər Əliyev tərəfindən qoyulmuş Yeni Azərbaycan Partiyasının bu gün Azərbaycan Prezidenti İlham Əliyevin rəhbərliyi ilə yeni-yeni nailiyyətlərə imza atdığını qeyd edən Ş.Əsgərov, bu uğurların zirvəsində tarixi Qarabağ Zəfərinin dayandığını vurğulayıb.
Nazirlər Kabineti Aparatının məsul əməkdaşı Qurban Sadıqov bildirib ki, ulu öndər Heydər Əliyevin Yeni Azərbaycan Partiyasının proqramında ifadəsini tapmış dövlətçilik strategiyası son 30 ildə bütün istiqamətlərdə Azərbaycanın dövlət müstəqilliyinin qorunub saxlanması, möhkəmləndirilməsi və inkişaf etdirilməsi prinsiplərinə söykənib.
Deputat Aqil Məmmədov qeyd edib ki, partiyanın yarandığı ilk gündən hər zaman əsas məqsədi dövlətin suverenliyinin təmin olunması, xalqın rifahının yüksəldilməsi və torpaq bütövlüyümüzün təmin edilməsi olub. Hazırda da partiyanın məhz ən böyük uğuru bizim Zəfərimiz, 44 günlük müharibədə düşmənə qalib gələrək torpaqlarımızın işğaldan azad olunmasıdır.
İqtisadi İslahatların Təhlili və Kommunikasiya Mərkəzinin Strateji Planlaşdırma və inkişaf departamentinin rəhbəri, iqtisad elmləri doktoru Aqil Əsədov çıxışında deyib ki, Yeni Azərbaycan Partiyası 30 il şərəfli yol keçərək monolitliyini qorudu, gücləndi, öz üstünlüyü, parlaq qələbələri ilə heç bir seçkidə rəqib tanımadı. Bu, ölkə vətəndaşlarının Azərbaycan reallığına verdiyi qiymət və Prezident İlham Əliyevin həyata keçirdiyi uğurlu daxili və xarici siyasətə inamın ifadəsidir.
Əməkdar jurnalist Adil Cəmil çıxışında öz gücünü xalqın dəstəyindən alan Yeni Azərbaycan Partiyasının ölkəmizdə davamlı islahatların həyata keçirilməsinə, ictimai-siyasi sabitliyin qorunmasına, Azərbaycanın inkişafına, dövlət müstəqilliyimizin güclənməsinə, ölkəmizin beynəlxalq nüfuzunun artmasına misilsiz töhfələr verdiyini vurğulayıb.
Sonra Kəlbəcər rayon ictimaiyyəti adından Azərbaycan Respublikasının Prezidentinə müraciət qəbul olunub.
Sonda rayonun ictimai-siyasi həyatında fərqlənən bir qrup partiya fəalına fəxri fərmanlar verilib.









Kateqoriya: Kəlbəcər
Tarix: 21-11-2022 22:18
Baxış sayı: 426
Adınız:*
E-Mail:
Şərhiniz:
Kodu yazın: *
yenilə, əgər kod görünmürsə
Yazı axını