Təhməz Cəfərov


Təhməz Cəfərovun şəkildəki gülümsər üzünə baxanda onunla onbeş ildən artıq birgə işlədiyim günlərim və ondan sonrakı qaçqınlıq illərində həsrətli görüşlərimiz yadıma düşdu. Aramızdan vaxtsız gedənlər haqqında danışmağımız həmin şəxsin özünü əks etdirməlidir.
Amma bəzən elə təriflər olur ki, yerinə düşmür,yamaq olur. El-obası, xalqı üçün çalışmışlar haqqında isə nə qədər təriflər yazılsa onun şəxsiyyətində zər-ziba kimi tikilib qalır. İndiki nəsil üçün örnək, həyat məktəbi olur.. Belə bir şan-şöhrətə layiq  Kəlbəcərin rəhbər işçilərindən biri olmuş Təhməz Cəfərov haqqında uzun-uzadı yox, çox qısaca  deyirəm ki, rayonumuzun əhalisi Təhməz Cəfərovu niyətsiz, qərəzsiz, təmiz, işgüzar adam kimi tanıyırdılar. Kəlbəcərin kənd təsərrüfatının bütün sahələrində olduğu kimi, türünçülük və heyvandarlıq sahəsinin inkişafinda onun çox böyük əməyi olmuşdur. Rayonumuz iqtisadi cəhətdən ən imkanlı  rayonlar cərgəsinə çıxa bildi. Rayon əhalisinin sosial həyat şəraitləri ilbəil yaxşılaşdı. 
O, "Nicat yolu" adlandırdığımız Murov-Toğana-Göygöl yolunun ideya müəllifi, bir başa təşkilatçılarından biri, bəlkə də birincisi olmuşdur. Elə bir gün olmazdı ki, o. yol işçilərinin yanında olub onların qayğıları ilə maraqlanmamış olsun.
Qısa bir müddətdə çəkilən xəyala gəlməyən Murov yolu ilə Kəlbəcər əhalisi beş ilə yaxın bir müddətdə çətinliklərlə üzləşsələe də  özlərinin ehtiyaclarını ödəyə bildilər. 
Bu yolla qərbi Azərbaycanın yüz mindən, Laçın rayonunun otuz mindən, Kəlbəcər rayonunun altmış mindən çox olan əhalisi erməni təcavüzündən qurtula bildilər. Elə bu səbəbdən də gün gələcək Təhməz Cəfərov başda olmaqla bu yolun çəkilməsinə rüsxət verənlərin və  çəkən mühəndis-mexanizatorların  Murov dağının zirvəsində hekəlləri ucalacaqdır.  
Başladığı hər-hansı bir işi axıra çatdıran idi. İnzibatçılığı ilə yanaşı qədir-qiymət bilən idi. O, zootexnik, rayon Kənd Təsərrüfatı İdarəsinin rəisi, Rayon Partiya Komitəsinin ikinci katibi vəzifəsində  işləyəndə də qərəzli mövqe tutmaqdan uzaq bir adam idi.  Sadə, təvazökar, geniş, saf ürəkli  olduğundan yoldaşlığından doymaq mümkün deyildi. 
Dəyərli ailə başçısı, dəyərli ata, dəyərli baba, dəyərli əmi, dayı  idi.
Şəxsi keyfiyyətləri haqqında  qat-qat kitablar yazmaqla onun  həyat yolundan söhbət açmaq mümkün olardı. Sözümün  sonunda  yalnız onu deyə bilərəm ki, Murov kimi buludlardan ucada duran qartallı dağın da  Təhməz Cəfərov kimi qartalı olmalıymış, oldu da.
 Allah, saf ürəkli dağlar oğlu əbədiyaşar  Təhməz Cəfərova rəhmət eləsin. Nur içində yatsın. 

Əli Uluxanlı  

Dalidag.az