Əslən Kəlbəcərdən olan tanınmış həkim-cərrah Zərraf Şirinov ixtisası üzrə professor elmi adı alıb.
Dalidag.az xəbər verir ki, bu barədə Z.Şirinov özü bildirib:

"Uzun illər gecə, gündüz çalışaraq apardığım elmi araşdırmaların nəticəsi olaraq, mənə Azərbaycan Respublikasının Prezidenti Yanında Ali Attestasiya Komissiyasının 28.01. 2022 tarixli qərarı ilə Tibb elmləri sahəsində Cərrahlıq ixtisası üzrə Professor elmi adı verilmişdir.
Başda Professor Famil Mustafayev olmaqla Ali Attestasiya Komissiyasının bütün əməkdaşlarına təşəkkür edirəm!
Azərbaycan Respublikasının elmi və praktiki cərrahiyyəsinə xidmət edirəm. Ömür vəfa edərsə sonuna qədər millətimə və dövlətimə vicdanla, döğru, dürüst və şərəflə xidmət edəcəyəm!"

Qeyd edək ki, Zərraf Təhməz oğlu Şirinov 5 sentyabr 1962-ci ildə Kəlbəcər rayonunda anadan olub. N.Nərimanov adına Azərbaycan Tibb İnstitutunda II müalicə-profilaktika fakültəsini bitirib. Akademik M.A. Topçubaşov adina Elmi Cərrahiyyə Mərkəzində Qaraciyər, öd kisəsi və mədəaltı vəzin cərrahiyə şöbəsinin müdiri, Tibb elmləri doktorudur. Bir çox ölkələrdə- Türkiyə, Ukayna və Almaniyada ixtisasartırma kursları keçib.
Zərraf Şirinov həm də bədii yaradıcılıqla məşğul olur. Şeirlərini Təhməzoğlu təxəllüsü ilə təqdim edən şair "Vətəndə qəribçilik" və "Gorumuza sarı gedək” adlı iki şeir kitabının müəllifidir.

Dalidag.az olaraq, dəyərli ziyalımız Zərraf Şirinovu bu münasibətlə təbrik edir, daha böyük uğurlar arzulayırıq.