Şahlar Əsgərov: "Həyatını bölüşüdüyün birini itirmək ən ağır itkidir..."

07-04-2021 17:51
Var olan bir gün yox olur. Yaradılış olum və ölüm adlı həyat fəlsəfəsinin qaçılması mümkün olmayan qanunlarına tabedir. Bəli, hər bir insan yer üzündə müəyyən zamana qədər qalıcıdır, sonra bizə məlum olmayan dünyanın qapılarından girib, ruhunu, cismini aid olduğu yerlərə təslim edir və bu dünya dediyimiz məkanla cismani əlaqəni kəsir. Ölüm adlı istənilməyən qonaq hər kəsin qapısından içəri girir. Kiminin anasını, kiminin atasını, kiminin övladını..., kiminin də ömür-gün yoldaşını ağuşuna alır və qalana dərd yükləyib çəkilir öz "evinə". Hər ölüm ağrılıdır. Ömrünü, həyatını paylaşdığın, saysız-hesabsız xatirələrinin şahidi olan, dünyanın içində bərabər dünya qurduğun həyat yoldaşını itirmək, həm də sadaladıqlarınla vidalaşmaqdır... 

Dalidag.az xəbər verir ki, bu yaxınlarda həyat yoldaşını itirən dəyərli ziyalı, professor Şahlar Əsgərov acısını dilə gətirərək bildirib ki, itkilərin ən ağırı ömür-gün yoldaşını itirməkdir: 
"Oğul ana itirir, qardaş bacı itirir, amma ən ağır itki ömür-gün yoldaşına düşür. Çünki, bunu yaşayanlar daha gözəl anlayar, həyatını bölüşdüyün birini itirmək, nə bilim... Hər bir insana belə itki müxtəlif cür təsir göstərir. Mənim yadımdadır ki, akademik Rafiq Əliyev də xanımının yoxluğunu və keçirdiyi hissləri yazılarında büruzə verirdi. Amma mən bir az qapalı insan olduğum üçün keçirdiyim ağır duyğuları ifadə edə bilmirəm. Hər bir hissi gizli yaşayıram. Təxminən 5-6 ay olar ki, bir kitab üzərində işləyirəm. Kitab üzərində çalışdıqca, Almaz xanımın dediyi sözlər yadıma düşür. Çox güman ki, bu kitabı Almazın əziz xatirəsinə həsr edəcəm. Almaz xanımı itirdikdən sonra fikir verirəm ki, övladlarım mənə daha çox zaman ayırır. Tez-tez gəlib baş çəkirlər, darıxmağıma icazə vermirlər. Amma anlamırlar ki, Almaz xanım hər saniyə ağlımdadı… O, hər işimdə mənə dəstək idi. Mən elmi fəaliyyətdə olan zaman bir müddət Almaz xanımın yanında olmadım, evin yükü onun öhdəsində qalmışdı. Amma o, çox asanlıqla bu işin öhdəsindən gəlirdi."

Dalidag.az



Kateqoriya: Kəlbəcər
Tarix: 07-04-2021 17:51
Baxış sayı: 359
Adınız:*
E-Mail:
Şərhiniz:
Kodu yazın: *
yenilə, əgər kod görünmürsə
Yazı axını