Doğma Kəlbəcərimizdən məcburi köçkün olan həmyerlilərimiz iyirmi səkkiz ilə yaxındır ki, respublikamızın, demək olar ki, bütün rayonlarında məskunlaşmışlar. Onların ən sıx məskunlaşdıqları rayonlardan biri də Bərdə rayonudur. 
Qədim Bərdə tarixən kəlbəcərlilərin aran bölgələrimizlə əlaqə saxladıqları avtomobil yolunun üzərində yerləşdiyindən burada, demək olar ki, hər bir kəlbəcərli ailənin dostluq, qohumluq və tanışlıq əlaqəsində olduğu insanlar olmuşdur. Odur ki, 1993-cü ildə torpaqlarımız ermənilər tərəfindən işğal olunanda məcburi köçkünlərin pənah gətirdikləri rayonlardan ilk sırada dayanan biri də Bərdədir. Bərdədə Kəlbəcər rayonundan olan minlərlə ailə məskunlaşmışdır. Kəlbəcər rayon icra hakimiyyəti bu ailələrlə, onların problemləri ilə vaxtlı-vaxtında maraqlanmaq, həmin problemlərin həllinə kömək üçün bəzi tədbirlər görmüşdür. Bu tədbirlər sırasında Kəlbəcər rayon icra hakimiyyəti başçısının Bərdə rayonunda səlahiyyətli nümayəndəsinin təyin edilməsi olmuşdur. Bu təyinatı uzun illərdir ki, Kəlbəcər rayonunun Hacı Alırzalar kənd sakini Əlizamin Mamedov layiqincə yerinə yetirir. Ə.Mamedov məcburi köçkün həmyerlilərimizin müraciətlərinə həmişə diqqətlə yanaşmağa,problemin vaxtında həll olunmasına çalışır. Onun vətəndaşlara hüquqi xidmətlər göstərmək üçün lisenziyası olduğundan həmyerlilərimizin məhkəmə işlərində onlara yaxından kömək edir.
Ə.Mamedovla söhbətimiz zamanı o bildirdi ki, həmyerlilərimizin rastlaşdıqları ən böyük çətinliklərdən biri hüquq-mühafizə orqanları ilə iş zamanı öz hüquqlarının müdafiəsi üçün haraya, kimə müraciət edəcəklərini bilməmələrindən irəli gələn çətinliklərdir. Məhkəmələrə işi düşən həmyerlilərimiz vəkil xidməti üçün xeyli pul xərcləməli olurlar. Bu da, əlbəttə, məcburi köçkün ailələrin maddi vəziyyətinə öz mənfi təsirini göstərir. Odur ki, biz həmyerlilərimizin vəkillik xidməti ilə bağlı işlərini də öz öhdəmizə götürür və minimum qiymətlərlə onlara hüquqi xidmətlər göstəririk. Bəzən onlarla söhbətimiz zamanı məlum olur ki, rastlaşdıqları vəkillər onlara göstərdikləri hüquqi xidmətlər üçün dəyərindən qat-qat artıq pul tələb edirlər. Biz bu halların da qarşısını almağa çalışırıq. Əlizamin Mamedov sözünün sonunda Ali Baş Komandanımız, Prezident İlham Əliyevin rəhbərliyi ilə şanlı Azərbaycan Ordusunun torpaqlarımızı düşmən tapdağından azad etməsi xəbərinin bütün məcburi köçkünlərdə böyük ruh yüksəkliyi yaratdığını, yaxın gələcəkdə doğma torpaqlarımıza qayıdacaqlarını və orada həmyerlilərimizə sevinə-sevinə hüquqi xidmətlər göstərəcəyini bildirdi. Biz də öz növbəmizdə onun arzularına qoşularaq "Arzunuz çin olsun!"dedik.

Oqtay SALAHLI
Dalidag.az