Bu şəkillərə və qeydlərə sosial şəbəkədə rast gələndə yazılanların doğru olduğuna şübhə etdik.  
Dalidag.az-ın kiçik araşdırması bu acınacaqlı vəziyyətin doğru olduğunu üzə çıxardı. İlahi, ilin-günün bu vaxtı, səhiyyənin "raketlerlə göydə uçduğu" zaman, analoqu olmayan bu sistemin indiki dövründə bu nə biabırçılıqdı. 50 il bundan qabaq "ölən" bu "daranqletlər" hansı üzlə xəstə qapısına sürülür? Bunda aparılan xəstənin sağalması, təcili xəstəxanaya çatdırılması necə mümkün olar. Yoxsa köçkün rayon olduğu üçün gözdən-könüldən uzaq düşüb....yox, bunun heç də məsələyə dəxli yoxdu. Dəxli odur ki, bu məsələyə sabiq rayon rəhbərliyi "vaxt tapmaylb", ya da heç lazım bilməyib. Rayon xəstəxanasının baş həkimi isə heç görməyjb. Ya da müasir tibbi maşın adı altında bu bədbəxtlər ölənəcən minilib çapılıb. Təzələr kağız üzərində gəlib-gedib...

Əslən Kəlbəcərdən olan vəkil Əziz Qənbərov bu acınacaqlı mənzərəni ictimailəşdirərək, məsələ ilə bağlı çağırış edib:
"Bu nəqliyyat vasitəsi Kəlbəcər Mərkəzi Xəstəxanasının Təcili Tibbi Yardım maşınıdır. Bu nəqliyyat vasitəsi ilə istinin bu günündə KORONOLU Kəlbəcərli xəstələr Qazağa aparılır. Digər xəstəxanalar bu nəqliyyat vasitəsini görəndə Kəlbəcər xəstəxanasının işçilərini lağa qoyurlar"- deyə vəkil Kəlbəcər rayon İcra Hakimiyyətinin başçısına səslənib:
"Burada əsas günah Səhiyyə Nazirliyinin olsa da Kəlbəcərin rəhbəri kimi sizin və sələflərinizin, baş həkimlərin də günahıdı! Siz bu məsələ barəsində Səhiyyə Nazirliyi qarşısında məsələ qaldırsanız hesab edirəm ki, öz müsbət həllini tapar". 

İnanırıq ki, rayon rəhbərliyi səviyyəsində bu məsələnin həllinə çalışılacaq və aidiyyatı təşkilatlar problemi aradan qaldıracaq. Bu həssas məqamda, dünyanın bu bəlayla mübarizə apardığı, insanların sağlamlığı önə çəkilən bir vaxtda belə yanlışlığa və səhlənkarlığa yol vermək olmaz...

Dalidag.az