Qurban Sadıqovdan kövrək xatirələr: Ata ucadır, zirvədir, dağdır – amma qarlı-buzlu yox

10-02-2024 14:17
Atam Rza Zeynal oğlu Sadıqov 15 iyun 1929-cu ildə Kəlbəcər rayonunda anadan olmuşdur. Ermənistanın hərbi təcavüzü nəticəsində 2 aprel 1993-cü il tarixdə ailəmiz məcburi köçkün düşərək Bakı şəhərində müvəqqəti məskunlaşmışdır. Avtomobil qəzası nəticəsində ciddi xəsarət almasına görə bir neçə il ağır tibbi əməliyyatlar keçirmiş, 10 fevral 2005-ci il tarixdə Bakı şəhərində vəfat etmişdir. Bu gün vəfatından 19  il  ötür.
   
Sənin üçün çox darıxıram ata! Anamla birlikdə bizi-böyük ailəmizi halal zəhmətinizlə böyütdünüz. Bu gün də səni tanıyanların hamısı xoş xatirələrindən, mərdliyindən, qonaqpərvərliyindən, imkansızlara əl tutmağından, vətənpərvərliyindən, xeyirxahlığından, qəlbinin genişliyindən ağız dolusu danışaraq, sənin əziz xatirəni dərin hörmətlə anırlar. 
 Yaşadığımız kənddə çox böyük əziyyətlə səninlə çiyin-çiyinə gözəl bir ev tikdik, hərtərəfli şərait yaratdıq. Təəssüf ki, erməni vandalizmi nəticəsində bizim də evimiz dağıdıldı, viran qoyuldu.
  Ata ağıla ilk gələn əzəmətdir, gücdür, qüvvədir, etibardır. Ata bu güclü keyfiyyətlərlə ən zərif, ən incə, ən kövrək duyğulara malik bir varlıqdır.
  Ata, ailənin təməlidir. O, nəslin həm kökü, həm davamıdır…
Ata ucadır, zirvədir, dağdır – amma qarlı-buzlu yox. Oğlu üçün sevgisi ilə sarılacağı, kürəyini güvənclə söykəyəcəyi, qızı üçün isə güllü-çiçəkli, aydın günəşli bir dağdır.
Ata Uca Yaradanın övlada böyük bir lütfüdür. Zamanında bu lütfün qədrini, dəyərini bilmək hər kəsə nəsib deyildir. Ataya, valideynə  dəyər verməyən nə keçmişinin, nə də gələcəyinin qədrini bilməz, milli varlığımıza, mənəviyyatımıza sahib çıxmaz. 
   2020-ci ilin payızında 44 günlük Vətən müharibəsində Azərbaycan Respublikasının Prezindenti, Müzəffər Alı Baş Komandan cənab İlham Əliyev Kəlbəcəri də işğaldan azad etdi. 2023-cü ilin sentyabr ayında bir günlük antiterror tədbirləri nəticəsində bütün ərazilərimiz işğaldan azad edildi. Hazırda işğaldan azad olunan bütün yaşayış məntəqələrində Azərbaycan Respublikasının Dövlət Bayrağı dalğalanır, genişmiqyaslı quruculuq, abadlıq, tikinti işləri intensiv şəkildə davam etdirilir.  Möhtərəm cənab Prezidentimiz  digər işğaldan azad olunan ərazilər kimi, Kəlbəcəri də dünyanın möcüzəsinə çevirir. 
  İndi ruhun şaddır. Məkanın cənnət olsun, ata!

Qurban Sadıqov
Dalidag.az












Kateqoriya: Karusel / Kəlbəcər
Tarix: 10-02-2024 14:17
Baxış sayı: 2165
Adınız:*
E-Mail:
Şərhiniz:
Kodu yazın: *
yenilə, əgər kod görünmürsə
Yazı axını