Doğma Kəlbəcərimiz özünün füsunkar təbiəti  ilə həmişə məşhur olmuşdur. Kəlbəcərin təbiətinin gözəllikləri barədə neçə-neçə şeirlər və mahnılar yazılmışdır. 
Bu günlərdə Dünya  TV  kanalında  ilk dəfə yayımlanan “Kəlbəcərliyəm” mahnısı da  Kəlbəcərimizin gözəlliklərinə və füsunkarlığına həsr olunmuşdur.  Sözləri və musiqisi Hüseyn Muxtaroğluna, aranjemanı Elnur Cəbiyevə məxsus olan mahnının ifaçısı həmyerlimiz, müğənni Şəbnəm Faiqqızıdır.   Kəlbəcər şəhərində doğulan Şəbnəm Faiqqızı beş yaşında olanda doğma yurdumuz  mənfur düşmənlərimiz tərəfindən işğal olunmuş.onun ailəsi həmin vaxtdan indiyədək  Sumqayıt şəhərində  məskunlaşmışdır. Sumqayıtdakı 24 saylı  tam orta  məktəbin dördüncü  sinfində oxuyarkən valideynləri Şəbnəmin musiqiyə olan həvəsini nəzərə alaraq onu Qubadlı Musiqi Məktəbinin muğam şöbəsinə qoyurlar.  Şəbnəmin ilk musiqi müəllimi Sevər Quliyeva ona muğam sənətini daha da sevdirir  və  muğamın sirlərini öyrədir. Orta məktəbi bitirdikdən sonra  Sumqayıt Musiqi Kollecinə daxil olan Şəbnəm Faiqqızı  orada  tanınmış müğənni , Respublikanın Xalq Artisti  Zabit Nəbizadədən muğamın sirlərini öyrənmişdir. Şəbnəm Faiqqızı bir müddət  Corat mədəniyyət evində çalışmışdır. Şəbnəm Faiqqızı  müğənni kimi fəaliyyət göstərdiyi dövrdə  dəfələrlə müxtəlif bölgələrdə hərbi hissələrdə  əsgər və zabitlərimiz qarşısında  konsertlər vermiş,mədəni- kütləvi tədbirlərdə iştirak etmiş , dəfələrlə fəxri-fərmanlar və diplomlarla təltif olunmuşdur. O, həmişə kəlbəcərli olmağı ilə fəxr edir. Şəbnəm xanımın ən böyük arzusu doğma yurdumuz Kəlbəcərdə məskunlaşmaq və orada yaşayan kəlbəcərlilər qarşısında konsert verməkdir.  Biz də həmyerlimizə yeni-yeni  uğurlar arzulayırıq.                        

Oqtay Salahlı,
Dalidag.az