Yurd-yuvalarımızın yağı tərəfindən işğalı insanlarımızın ruhunu yaraladı, ömrünü qısaltdı, yaşamaq həvəslərini öldürdü. Həyatlarında aldıqları qəfil zərbə dərd oldu onlara, göynək ağrılara tab gətirmək məcburiyyətində qaldılar. Az-az adamlarımız oldu ki, bu ağrı-acıya dözüb müəyyən yaşa doldular. Bəlkə də nə vaxtsa yurda qovuşmaq ümidi, inam hissi güc verdi onlara.
Alı baba Kəlbəcərsiz uzun ömür sürən həmin adamlardandı. Bu gün Kəlbəcərin Şahkərəm kındində doğulub-boya başa çatan, sonradan taleyini Bərdə rayonuna bağlayan  Alı Museyib oğlu Abbasovun 94  yaşı tamam olur.

Qeyd edək ki, Alı Museyib oğlu Abbasov 13 mart 1928- ci ildə Kəlbəcər rayonunun Şahkərəm kəndində anadan olub. 1942-ci ildə ailəsi ilə bərabər Bərdə rayonuna köçüb. Ən yaxın sirdaşı-həyat yoldaşı  Qumru Bahadır qızı Abbasova 1936-cı ildə Şahkərəm kəndində dünyaya gəlib. Ömrünün 86-cı baharını yaşayır.
A. Abbasov zəhmətkeş ailə başçısı olub. Ömrü boyu qoyunçuluqla məşğul olub, uzun müddət qoyunçuluq fermasının müdiri işləyib. İşğala qədər fermaları həmişə Kəlbəcər yaylaqlarında olub.
Hal-hazırda Bərdə rayonunun Nəcəfqulubəyli kəndində yaşayır. Kənd həyatının çətinliklərinə, qayğı və problemlərinə baxmayaraq övladlarını layiqincə böyüdüb, tərbiyə edid, təhsil verib. Bu gün həyat yoldaşı, ata, baba, vətəndaş kimi üzüağ, alnıaçıqdır. Həyat yoldaşı Qumru xanımla gənc nəsilə örnək olan bir ömür yaşayıb Alı kişi. Xeyirxahlığı, dosta-qohuma əltutan olması, elinə-obasına bağlılığı onu hər kəsə sevdirib. Bir el ağsaqqalı kimi hörmət-izzət sahibidir.

Rafiq, Raqub adında iki oğul və Arzu, Mehriban adlı iki qız övladları var. Rafiq Abbasov Özbəkistanda ali təhsil alıb.
Alı kişinin 8 nəvəsi, 6 nəticəsi var.
Zamanında ciyərlərinə çəkdiyi Kəlbəcər dağlarının havası, gül-çiçəyiinin ətri, cismini doydurduğu təmiz qidası və bir də o yerlərə olan sevgi, yurda dönmək eşqi sayəsində Alı baba 94 yaşa çatıb. Həyat yoldaşı 86 yaşlı Qumru nənə ilə birlikdə daha uzun ömür arzu edirik Alı kişiyə.

Dalidag.az

P.S. "Çovdar və Şahkərəm" Cəmiyyətinin üzvləri Alı Museyib oğlu Abbasovu 94 yaşı tamam olması münasibətilə təbrik edir, 100 yaşını doğulduğu Kəlbəcərdə - Şahkərəm kəndində keçirməyi arzulayırlar!