Kəlbəcər şairlər yurdudur. Bu artıq təkzib olunmaz və çoxdan təsdiqini tapmış bir deyimdir. O ecazkarlığın, o bənzərsiz təbiətin, Tanrının min rəng, min çalarla gözəllik naxışı vurduğu möcüzə yurdun havasını udub, suyunu içib ya şair olmalısan, ya aşıq. Bu da bir həqiqətdir ki, elə aşıq sarıdan da Kəlbəcərin, kəlbəcərlilərin bəxti gətirib. Milli folklorumuzun dayaq sütunu, varlığı ilə şifahi ədəbiyyatımıza canlılıq gətirən aşıq yaradıcılığı Kəlbəcərdə də çox sevilib. Kəlbəcərin aqil, sənətə meyilli insanları aşıq yaradıcılığını sevməklə kifayətlənməyib, sarı simlərin ecazını yaşatmaq ənənəsinə də imza atıblar. Kəlbəcər aşıq məktəbi həmin imzanın bəhrəsi və silinməyən izidir. Əbədi könüllərdə yaşayan, bu gün də böyük sevgi və ehtiramla anılan Aşıq Qurbanın, azman varisi Dədə Şəmşirin qədim ənənələrə söykənən, əsrlərin o tayından boy verən aşıq-söz sənətinə verdiyi töhfələr Azərbaycan aşıq yaradıcılığında xüsusi yer tutur. Miras qoyduqları aşıq məktəbi isə ölməzlik zirvəsindədir. O zirvə məktəbdən bəhrələnənlərdən biri də gənc aşıq Şəhriyar Kəlbəcərlidi.
Əslən Kəlbəcərin Başlıbel kəndindən olan Şəhriyar 1994-cü il yanvar ayının 19-da Bərdə şəhəri Xanərəb kəndində anadan olub. İlk təhsil yolu paytaxtdan keçib. Orta məktəbi Bakı şəhərində oxuyub bitirən Şəhriyar, təhsilini Gömrük işinin təşkili ixtisası üzrə Bakı Texniki kollecində davam etdirib. Vətənə xidmət borcunu yerinə yetirib, hərbi mükələfiyyyətini qazanıb. Hal-hazırda Lənkəran Dövlət Universitetində Beynəlxalq ticarət və logistika fakültəsində təhsil alır.
Şəhriyarın qismətinə Kəlbəcərin işğalından sonra doğulmaq düşüb. İndi adını təxəllüs kimi daşıdığı Kəlbəcərin üzünü görməsə də, ruhu oraların havasına köklənib. Evdən-ailədən gələn yurda bağlılıq anlayışı, gen daşıyıcılarının, qanın ixtiyarsız olaraq köklərə yönəltməsi onun kəlbəcərli kimi yetişməsinə təkan verib. Saz sənətinə, aşıq yaradıcılığına meyilliliyi də elə bu kökdən qaynaqlanıb. Uşaq yaşlarından həvəs göstərib bu sənətə. Mütamadi aşıqları, ustad sənətkarları dinləyib. Fərdi müəllimi olmayıb. Ancaq gördüklərindən, eşitdiklərindən dərs alıb, bəhrələnib. İstedad Tanrıdan gəlib, çalışqanlığı və diqqəti bu istedadı geniş auditoriyaya sərgiləmək imkanı verib. Zamanla dövlət tədbirlərində, konsertlərdə iştirak edib. Uzun müddətdir “Lider” kanalında yayımlanan “Sənin ulduzun” müsabisəqinin iştirakçısıdır. Aşıq Namiq Fərhadoğlunun rəhbərliyi və aparıcılığı ilə keçirilən müsabiqədə Şəhriyar münsif heyətinin və tamaşaçıların rəğbətini qazanıb. İfası bəyənilib. Müsabiqə sms üsulu ilə keçirildiyindən qalib olmaq onun və digər iştirakçıların öz əlində deyil. Düşünürəm ki, elə-obaya, dosta  sadiq Kəlbəcər əhli bu yarışmada yurddaşlarını tək qoymayacaq, dəstəklərini əsirgəməyəcəklər. Şəhriyarın müsabiqədə növbəti çıxışı qarşıdakı həftənin çərşənbə günündə nəzərdə tutulub. Gənc aşığa uğurlar diləyir, müsabiqədə və həyatda hər zaman qalib olmağı arzulayıram!

Sevinc Qərib
Dalidag.az