KÜLƏYƏ...YAĞIŞA...SƏNƏ


...Tanrının bircə işarəsilə 
coşdu külək!
Qalxdı havanın təzyiqi...
Saçını yolub verdi yelə,
yarımçıq doğuş keçirən hamilə 
ağaclar..
Uladı teleqraf dirəkləri..

Çəkdiyi ağrılara tab etməyib
"geniş ürək infarktı" keçirdi
 yaxınlıqdakı transformator...
Əl-ələ tutub qoşa endilər cəhənnəmə,
birgə günahlarından od alan
elektrik xətləri!

Qorxusundan susub çəkildi taxta evciyinə,
səhərəcən ulduza hürən
boz köpək..

...Kimsə bir yarımçıq şam tapıb gətirdi,
bu yandan özünü yetirdi,
 plastik əməliyyat keçirib cavanlaşan
qədim çaxmaq daşı...!

Bir dilim alova təslim oldu
qaranlıq!
Beləcə başladı
müasir insanın
mağara həyatı....

BƏNDƏ OLA BİLMƏDİM

Hər yetənə can dedim, 

Canda ola bilmədim. 

Bağışla məni,tanrım, 

Bəndə ola bilmədim

Ağu uddum bələkdə,

Baş açmadı fələk də. 

Sən istəyən diləkdə 

Kamda ola bilmədim. 

And içib anda düşdüm, 

Yerə yüz yöndə düşdüm. 

Peyğəmbərlər dəyişdim, 

Dində ola bilmədim. 

Kim doğdu bizi belə 

Yarı şah, yarı kölə...

O rəngdə, o biçimdə 

Donda ola bilmədim. 

Dolu-dolu vurdular, 

Əl-əl gəzdilər məni. 

Yüz ağaca bar etdi

Dili sözdülər mənı. 

Aldadıb oynatdılar, 

Oynatdılar atdılar...

Heç neçəyə satdılar 

Əli közdülər mənı. 

Nə sultanam, nə də bəy,

Xan da ola bilmədim. 

Bağışla məni tanrım, 

Bəndə ola bilmədim...  

AĞRILARIMA...

Dolar bədəninə vaxt gözləmədən

Oxuyar üzünə hökmü ağrılar.

Hoyına,huyuna bələd duyğutək

Dolaşar canında qəfil ağrılar.

Sığıyıb zəhrini tökər yuxuna

Qara bulud kimi çökər yuxuna

Girər arzuların yaşıllığına

Doğrayar içini qafil ağrılar.

Tutar əl-qolunu təkləyər  səni

Sıxıb bir bucağa saxlayar səni.

Sanki suç üstündə haqlayar səni

Asılar qapından qıfıl ağrılar...

Ayrılıqdan tez başlayır ayrılıq....

Qış başlayır yaz başlayır ayrılıq..

Yağış tökür, qar yağdırır üstümə

Hər nəfəsdə eşq də durur qəsdimə.

Hər nəfəsdə slzıldayır ciyərim

Eşq də boğur, yaş da boğur rəngimi.

Sən gedirsən...

yepyenidi hər dəfə

Sən gəlirsən...

səngimir ki, ayrılıq...

Çoxu gəlib ümid verir uşaqtək

Elə bil ki,oyuncağım sınıbdı..

Bir baxıram qoynumdadı əllərim

Bir də görrəm barmaqlarım yanıbdı...

Ayrılıqdan tez başlayır gec bitir

Ömürdən də uzun olur ayrılıq.

Saçaq-saçaq, düzüm-düzüm tellənir..

Saçlarımda hüzn olur ayrılıq...

...Qanı elə tez qaynayır qanıma,

Ondan qabaq dərdi alır canımı...

Əlim qolum sınıb düşür yanıma..

..Ayrılıqdan tez başlayır ayrılıq...