Koronavirus bütün dünyanın qaranlıq kabusuna çevrilib. Hal-hazırda koronavirus ilə dünya arasında müharibə mövcuddur ki, bu müharibədə itkilər də az deyil. İnsanlar bir tərəfdən ölümlə, digər tərəfdən də öz daxilləri ilə mübarizə aparırlar. Bu müharibədə ən güclü ordu isə həkimlərimizdir.Onlar gecə-gündüz özlərini fəda edərək, insanları bu qaranlıqdan çəkib çıxarmağa çalışırlar. Bu müharibənin əsl şəhidləri onlardır. İnsanları müalicə etməyə çalışarkən özünü də yoluxduran, şəhid olan, ailəsindən uzaq qalan, hər növ çətinliyə dözən həkimlər bütün dünyanın alqışına layiqdirlər. Bütün çətinliklərə, baş verən neqativliklərə baxmayaraq  böyük səylə çalışan, bəzən ac, susuz qalan, yorulduqda belə bunu bildirməyən daim gülərüz, həyata ümidlə baxanlar məhz həkimlərdir və onlar əsl qəhrəmanlardır.  
 
Covid-19 virusu ilə mübarizə aparan dövlətlərin siyahısına Azərbaycan da daxildir. Bu günə qədər ölkəmizdə 500.000-dən artıq test keçirilmişdir. Ölkədə virusu aşkar etmək üçün bütün imkanlar mövcuddur. Virusun aşkar edilməsi üçün yeni laboratoriyaların qurulması çox önəmlidir. Laboratoriyaların düzgün cavabı əsasında virusa yoluxanlara müalicə təyin olunur. Koronavirus infeksiyasının ölkədə yayılmasının qarşısının alınması üçün bir çox laboratoriyalar qurulub istifadəyə verilib. Onlardan biri də Sumqayıt şəhər 1 saylı xəstəxananın nəzdindədir. Düzgün işin qurulması, testlərin aparılma formasına nəzarət, testlər həyata keçirilərkən təhlükəsizlik qaydalarının əməl olunması və digər məsuliyyətli vəzifələri laboratoriya müdiri Aqşin Hümbətov icra edir. Testlərin qoyulmasında Sona Məmmədova iştirak edir. 20 illik iş təcrübəsi, işinə peşəkar yanaşması daim onu diqqət mərkəzində saxlamışdır və bu mühim vəzifəni icra etməsinə səbəb olmuşdur. İşin məsuliyyətli və çoxluğu ailəsinə az vaxt ayırmasına səbəb olur. Günə yüzlərlə test nümunəsinin həyata keçirilməsi çox çətin prosesdir. Gərgin iş prosesinə baxmayaraq Sona xanım təbəssümünü əsla üzündən əksik etmir. Bu isə onun işinə olan sevgisindən irəli gəlir. Sona xanım əməkdaşları Baxşıyeva Nuranə və Əhmədova İradə xanımla çiyin-çiyinə çalışır . Bundan əlavə, Lamiyə və Mehriban adlı xanımlar laborant vəzifəsində çalışırlar. Bu prosesdə onların da mühim rolu vardır.  
Bu günlərdə göstərdikləri fədakarlığa və yüksək peşəkarlığa görə sözün əsl mənasında səhnə arxasında əziyyət çəkən tibb işçilərinə təşəkkürümüzü bildiririk. İsti hava şəraitində xüsusi qoruyucu vasitələrdən - kombinezon, tibbi maska, tibbi eynək və əlcəkdən istifadə edirlər. Bu vəziyyətdə çalışmaq çox çətindir və  xalq üçün fədakarlığın bir nümunəsidir. Vətəndaşlarımızı bir daha anlayış və məsuliyyət nümayiş etdirməyə dəvət edirik. 
 
Leyla Əhmədzadə 
Dalidag.az