Fərid Muradzadə

* * *
Təyyarə pəncərəsi
Çəkilib göy üzünə 
Qara bulud pərdəsi
Gecə ...sakitlik...huzur
Gözlər yarıyuxulu
Hər tərəf zil qaranlıq 
Bir azca da yorğunluq 
Təyyarə uğultusu 
Təkliyin pıçıltısı 
Qəlbimin döyüntüsü 
Səni tənhalığıma 
Pir eylədi,ilahi
Sən ey gözəgörünməz,
Sən ey yeri bilinməz
Ey laməkan Yaradan,
Yoxluqdan var yaradan.
Yorulurdum yerdə də
Yoruldum e, göydə də
Usanıb sıxıntıdan 
Gileyləndim ilahi,
Bir anda ay parladı
Sən möcüzə göstərdin 
Qaranlıq kainatı 
Nur eylədin ilahi.

* * *
Gözlərimin yağışı tək,
Narin-narin yağış yağır.
Ulu, qoca şəhərdəyəm,
Mən sığıram bu şəhərə,
Şəhər mənə sığışmayır.

O tayda qoydum özümü,
Kədər bürümüş üzümü.
Qərib sayma bu sözümü,
Gözü dəniz, üzü bulud,
Şəhər mənə yovuşmayır.

Təkliyimə çıraq oldum,
Ağacında yarpaq oldum,
Arzuladım, könül qoydum,
Gəlib qovuşdum şəhərə,
Şəhər mənə qovuşmayır.

Dalidag.az