Səddam Laçın

Dalidag.az Sevinc Qəribin təqdimatında Səddam Laçının şeirlərini təqdim edir:

İLAYDA

Yığıb qəpiklərimi
iti addımlarımla
metroya tələsirəm...

Arxadan bir səs gəlir-
"Sevdiyin qızın canı..."
Bilirəm, dilənçidir, qızın sözün kəsirəm.

Pul istəyir deyəmi
Pulum qədər susuram?

Nə deyəcəm bilmirəm.
Gözlərinə baxıram
və birdən soruşuram:

-Mənim sevgisiz qızım,
nə bildin sevdiyim var?
sevdiyim qızın canı,
əllicə qəpiyim var.

Mənim qaraçı qızım,
Səni sevən olub ki?
Kim isə sevdiyinin
canına and verəsən?

Mənim balaca qızım,
Kimsə sənin canına
And verəcək görəsən?

Başım dolu, cibim boş
Nə verəcəm sənə mən?

Nə deyəcəm, qara qız?
on qəpik dilənməsəm,
Gecə evə ayaqla
Gəlməyi düşünürəm.

Mənim payız bənizlim,
Çıxar, sən on qəpik ver,
Bu aralar onsuz da
Ölməyi düşünürəm.

Balaca, nəyi var ki, bəxş edə əmin sənə?
Böyüklük səndə qalsın,
Sən adını bəxş elə,
De görüm, adın nədir?
- İlayda

- Adını deyə-deyə
Necə gülə bilirsən?
Adına qurban olum,
Mənasını bilirsən?

İlayda - su pərisi!

Günə bax, saata bax,
Ada bax, həyata bax,
Qəpik-quruş hərisi
Dilənən su pərisi!
Əl açıb diləndiyi
Qafiyə dilənçisi...

Ehh, mənim kömür qızım
Bəxtinləmi yarışır gözlərinin qarası?
Əlləri boş qalanım, qəpik-quruş yuvası
Balaca əllərinə...
Gözlərinin xətrinə şeir yazım, bağışla.

Gözün kimi bax ona,
Ovuclarında gizlət,
Silinməsin yağışla...

TANRILARIN ŞEİRİ

Məni himayənə al, Artemida
İnsan olmaq yorur məni
Qarışqa olsaydım,
Çiyinlərimdəki yükü
Ruzi bilərdim
Sevə-sevə daşıyardım.
Kəpənək olsaydım,
İntiharı düşünməzdim
Uça-uça yaşayardım.

Hörümçək olsaydım,
"Xərçəng"-lərin saçlarını hörərdim
Quş olsaydım,
Haralısan deyənlərə gülərdim
Donuz olsaydım,
Vegeterianları ayrıca,
Yəhudilərlə müsəlmanları
Bir arada sevərdim

Oxunu heyvanlara tuşla, Eros
İnsanlar seviləsi hər şeyi sevib

YUXU
 
Yum gözünü, bəlkə hər şey düzəldi?
Bir yuxu ki gerçəyindən gözəldir,
Oyanma.

Oyandınsa, yuxulara inanma.
Bir yuxudur gerçək olan, bir həyat,
Aç gözünü, inanmasan, bir də yat.
Yubanma.

Yubandınsa, əbədi yat, oyanma.
Ölmüşəmmi ağlayasan, gözəlim?
Kim desə ki, ağlamaqla düzəlir,
İnanma.

İnandınsa, ağla qızım, utanma.
Bir eşqi ki, qurban verdik bir səhvə,
Yüz dəfə də "gəlmə" desəm, bir dəfə
Gəl, amma
Evdə səni gözləyirlər, yubanma.

ÜSYAN

Haqq ədalət bərpa olsun, İlahi
Ağladanlar, ağlayana gülməsin
Söz vermisən, sözünü tut, bir nəfər
Yaşatdığın yaşamadan ölməsin

Nə var axı asimanda qalmağa
Bacarırsan ürəyimdə qal, Allah
Sən demişdin heç kimi çox sevməyək
Onu səndən çox sevirəm, al, Allah

Mənə nələr yaşatmadı, vəfasız
Mən əvəzdən dilin gəlsə, söyərsən.
Sən demisən düzəlməsə, döy düzəlt.
Mən qıymadım, əlin gəlsə, döyərsən.

SƏNDƏN GÖZƏL OLMASIN
 
Mən səni neynirəm ki…
Sən olsan da, sevirəm, olmasan da, sevirəm.
Ey dodağı yasəmən, yanaqları qızılgül,
Qorxma payız gələndə,
Sən solsan da, sevirəm, solmasan da, sevirəm.
Sən sev deyə sevmirəm…
Mən səbəbsiz sevirəm, qarşılıqsız sevirəm.
Sizin sevgiləriniz bu gün olur, sabah yox,
Mən sevəndə bir ömür ayrılıqsız sevirəm.

Mən səni neynirəm ki…
Sən olmayan günlərin
Hər günü bir şeirdi, hər günü bir qəzəldi.
Səndən gözəl olmasın, sənsizlik də gözəldi.

TƏNHALIĞIN ŞEİRİ 

Yenə də düşmüsən yada bu axşam
Yenə boğuluram qəmdə, kədərdə
Gözlərin bəstəkar, dilin nəğməkar
Səni itirirəm zümzümələrdə

Sübhəcən göz yaşı, sübhəcən kədər
Birdəki can verən cavan ümidlər
Hələ yoxluğuna alışmayıblar
Arabir yenidən ümidlənirlər

Baxıb bu halıma yazıq dedilər
Ətrafa boylandım bir az yüksəlib
Gördüm kimsə yoxdur məndən savayı
Özüməm, özümə yazığım gəlib

İncidim özümdən, küsdüm özümdən
İnsan da özünə yazıq deyərmi?
Bir adam sevdiyin itirən zaman
Ürəyi bir nəfər azıq deyərmi?

PİS ADAM

Sən nə vaxt oldunsa, dostu axşamın
Mən o gün zülmətə vurulan kəsəm
Mən gecə sübhədək əriyən şamın
Divarda qoyduğu bir parça hisəm

Bir od olub, alışmağa nə var ki,
Yad işinə qarışmağa nə var ki,
sənlə küsüb barışmağa nə var ki,
Hünərin var məni mənlə barışdır

Özümdən inciyəm, özümdən küsəm
Sən getmisən, yerin dolmur, əzizim
Pis adama heç nə olmur, əzizim
Özündən qorx, mən ölmərəm, mən pisəm

Mən gecə sübhədək əriyən şamın
Divarda qoyduğu bir parça hisəm

Dalidag.az