Bu gün adını "Manevr.az" qoyduğumuz şərəfli missiyamızın 6-cı yaşını qeyd edirik.
6 ildir üzərimizə götürdyümz yükün ciddiliyini dərk edərək, getdiyimiz yolda, atdığımız hər addımda qarşımıza çıxan (çıxacaq) bütün problemləri, çətinlikləri, maneələri qətiyyətlə dəf etmək əzmi ilə çalışdıq. 
2016-ci il avqust ayının 1-də heç bir maddi dəstək olmadan, az sayda əməkdaşla yayıma başlayan "Manevr.az"-ın əsas məqsədi gündəmə uyğun informasiya hazırlamaq, yeni xəbər istehsal etmək, ölkədə və dünyada baş verən mühüm hadisələri operativ olaraq oxucuya çatdırmaq idi. Çətin olsa da məqsədimizə nail olduğumuzu ötən illər qazandığımız uğur və nailiyyətlər təsdiq edir. Problem bolluğunda nə qədər əziyyət çəksək də bu gün də yolumuza davam edirik. 
Bu gün Manevr.az Azərbaycan media məkanında kifayət qədər oxucu auditoriyası qazanıb. 6 il  zaman  etibarı  ilə böyük  müddəti əhatə  etməsə də görülən işlər, bu ağır informasiya burulğanında boğulmadan, üstəlik yuxarıda qeyd  etdiyim  kimi, heç bir  dəstəksiz fəaliyyətini  davam etdirə bilmək gücü əslində bu 6 ili daha da dolğunlaşdırıb. Deyə bilərik ki, az vaxtda çox iş görməyə nail olmuşuq. 
Bu müddətdə bizimlə əməkdaşlıq edən qurumlar, fərdi qələm sahibləri oldu ki, onlara bizimlə yol yoldaşı olduqları üçün çox sağ olun, deyirik.
Fəaliyyətimiz boyunca neçə- neçə vətəndaşımızın  sosial  problemini  işıqlandırmaqla aidiyyəti qurumlara çağırışlar  etdik, problemlərin həllinə vəsilə olmağa çalışdıq. İlk qələm sınaqlarını redaksiyamıza göndərib yayımlanmasını istəyən  gənc yazarlara  dəstək olmağı da  özümüzə  borc  bildik. Bu illər ərzində xeyli nailiyyətlərə imza atdıq. Azərbaycan Mətbuat Şurasının üzvü olaraq müstəqil mətbuat arenasında aparıcı  saytlar  sırasında yer almağı bacardıq. 
Bu gün saytımızın 6 yaşı tamam olur. 6 yaşlı "Manevr.az"- ın  bundan  sonra  da  öz missiyasına sadiq  qalacağına, oxucu  tələbinə  cavab  verəcəyinə,  haqlının yanında olacağına və  bu xüsusda  ədalətli  yanaşması  ilə  sözə  xəyanət  etməyəcəyinə  əminəm.
30 ildən artıq sözə xidmət edən, jurnalistikada külüng çalan, xarakteri, prinsipiallığı, tələbkarlığı və məsuliyyəti ilə kollektivi sözün əsl  mənasında bir yumruq kimi saxlamağı bacaran Azərbaycan Yazıçılar Birliyinin və Azərbaycan Jurnalistlər Birliyinin üzvü, Prezident  təqaüdçüsü, saytın təsisçisi şair, jurnalist Namiq Dəlidağlının rəhbərliyi ilə çox illər qət etməyi düşünürük. Bu inam, qətiyyət və çalışqanlıqla ən az 50 yaşa varacağımıza  inanıram.
Əziz "Manevr.az" rəhbərliyi, kollektivi, 6 yaşımız mübarək!  Hədəfimizə çatmağı və indiki kimi gələcəkdə də biz olmağı  arzulayıram özümüzə. Əlbəttə bu təbrikdən bizimlə əməkdaşlıq edən həmkarlarımıza və  saytımızın  oxucularına da pay düşür. Hər birimizə uğurlar!

Sevinc QƏRİB 
Dalidag.az