Kəlbəcər Rayon İcra Hakimiyyətinin başçısı Azər Qocayev İctimai Şuranın yeni seçilmiş heyəti ilə görüş keçirib.
Dalidag.az-ın xəbərinə görə, görüşdə Rayon İcra Hakimiyyəti ilə İctimai Şura arasında əməkdaşlığın daha da inkişaf etdirilməsi, ictimai iştirakçılığın genişləndirilməsi, vətəndaşların müraciət və təkliflərinin öyrənilməsi, eləcə də rayonun ictimai həyatında ictimaiyyət nümayəndələrinin fəal iştirakının təmin olunması məsələləri müzakirə edilib.
Rayon İcra Hakimiyyətinin başçısı Azər Qocayev İctimai Şuranın fəaliyyətinin dövlət orqanları ilə ictimaiyyət arasında qarşılıqlı əlaqələrin möhkəmləndirilməsi baxımından əhəmiyyətini vurğulayıb və yeni heyətə fəaliyyətində uğurlar arzulayıb.
Görüş çərçivəsində İctimai Şuranın yeni seçilmiş üzvlərinə üzvlük vəsiqələri təqdim olunub. Daha sonra İctimai Şuranın üzvləri ilə xatirə şəkli çəkdirilib.
Görüş zamanı İctimai Şuranın qarşıdakı dövr üçün fəaliyyət istiqamətləri, həyata keçirilməsi nəzərdə tutulan tədbirlər və ictimaiyyətlə əlaqələrin daha da genişləndirilməsi barədə fikir mübadiləsi aparılıb.

Dalidag.az