Diasporla İş üzrə Dövlət Komitəsinin xaricdə yaşayan və uğurlu karyera qurmağı bacaran azərbaycanlılarla əlaqələri möhkəmləndirmək məqsədilə həyata keçirdiyi “Liderliyin inkişafı proqramı”nın ölkəmizə səfərə gəlmiş bir qrup iştirakçısı - Fransada və beynəlxalq miqyasda hüquq və vergi məsələləri üzrə xidmətlər təklif edən “LEXLOR” beynəlxalq hüquq şirkətinin rəhbəri və təsisçi partnyoru Edmond Verdier, Türkiyədə fəaliyyət göstərən “Edison” hüquq bürosunun sədri Ruslan Edison, Almaniyada miqrasiya və qaçqın məsələləri üzrə ictimai fəaliyyətlə məşğul olan Nurlan Məmmədov, Ukraynadakı “Riç-İnter Qrup” Açıq Səhmdar Cəmiyyətinin baş direktoru Murad Cəfərov, Gürcüstanın “EVEX” klinikalar şəbəkəsinin satış üzrə koordinatoru Murad Muradov Qaçqınların və Məcburi Köçkünlərin İşləri üzrə Dövlət Komitəsində olublar. 

Komitənin sədri Rövşən Rzayev qonaqlarla görüşüb, onlara qaçqınlar və məcburi köçkünlərlə iş sahəsində aparılan dövlət siyasəti barədə məlumat verib. 
Prezident İlham Əliyevin məcburi köçkünlərin problemlərinin həllini sosial siyasətin prioritet istiqamətlərindən biri kimi müəyyən etdiyi, Birinci vitse-prezident xanım Mehriban Əliyevanın bu kateqoriyadan olan insanlara xüsusi diqqət və qayğı göstərdiyi bildirilib.  
Qeyd olunub ki, Azərbaycan dövlətinin qaçqınlıq və köçkünlük probleminin həlli sahəsindəki təcrübəsi bütün dünyada nümunə kimi qəbul edilir. Qaçqınların və məcburi köçkünlərin yaşayış şəraitinin yaxşılaşdırılması  və sosial müdafiəsinin gücləndirilməsi üçün ardıcıl zəruri tədbirlər həyata keçirilsə də, onların ən böyük arzusu doğma torpaqlara qayıtmaqdır.  
Komitə sədri Ermənistan-Azərbaycan Dağlıq Qarabağ münaqişəsi, bununla əlaqədar xalqımızın üzləşdiyi ədalətsizlik haqqında həqiqətlərin dünya ictimaiyyətinə çatdırılmasında diaspor nümayəndələrinin böyük rol oynadığını diqqətə çatdırıb. Eyni zamanda qeyd edilib ki, bu istiqamətdə həyata keçirilən tədbirlər daha geniş auditoriyaya ünvanlanmalı və daha effektiv olmalıdır. Diaspor nümayəndələrinin məcburi köçkünlərin təhsil, səhiyyə, məşğulluq kimi sosial problemlərinin həllinə dəstək verməsinin, fəaliyyət göstərdikləri ölkələrdəki müvafiq təşkilatları da bu işə cəlb etməsinin əhəmiyyəti vurğulanıb.  
Qonaqlar səmimi qəbula görə təşəkkür bildiriblər, görüşdə müzakirə olunan məsələlərlə bağlı fəaliyyətləri daha artıracaqlarını bildiribər.  
Daha sonra qonaqlar Abşeron rayonunun Masazır qəsəbəsində məcburi köçkünlər üçün salınmış yaşayış kompleksində olublar, burada müvəqqəti məskunlaşmış soydaşlarımızla görüşüblər.

Dalidag.az