Hörmətli cənab Prezident! Çox təəssüf hissi ilə bildirirəm ki, Sizin seçkilərin şəffaf keçirilməsi ilə bağlı verdiyiniz göstəriş mənim də namizəd olduğum 123 saylı Kəlbəcər Seçki Dairəsində kobud şəkildə pozulmuşdur.

Biz gənclər Sizin çağırışınızdan ruhlanaraq bu yola çıxsaq da Kəlbəcər rayonunun bəzi şəxsləri öz inzibati təsirlərindən istifadə edərək Sizin iradənizin ziddinə olaraq öz çirkin niyyətlərini reallaşdırmaq üçün hədsiz dərəcədə seçki saxtakarlıqları törətmişdirlər. Bu dediklərimi əlimizdə olan böyük sayda sübutlar da təsdiq edir. Yaxın vaxt ərzində bütün bu sübutları Sizə təqdim edəcəyəm. Sonda qeyd edim ki, xalqımız Sizin bu seçkilərlə bağlı ortaya qoyduğunuz siyasi iradəyə güvənərək Sizin çağırışlarınıza hər zaman olduğu kimi müsbət yanaşıb. Lakin bu saxtakarlıqları törədən şəxslər xalqın inamını sındırmağa çalışır. Bu isə Sizin son zamanlar apardığınız islahatlara kiçik məmurların böyük zərbəsidir. Biz inanırıq ki, Siz bu məsələdə ciddi iradə ortaya qoyaraq saxtakarlıqların qarşısının alınması üçün ciddi göstəriş verəcəksiniz.

Hörmətlə; Əziz Qənbərov,
123 saylı Kəlbəcər Seçki Dairəsindən
deputatlığa namizəd

Dalidag.az