Bir gün dedim ki, ustad, məni o şairlə görüşdür. Allahın bir xoş günündə Yusif müəllim zəng etdi ki, gəl səni Xəqani müəllimlə tanış edim, mən də geyinib, kecinib sevincək getdim görüşməyə. Zəng etdim ki, hardasınız, dedi ki, köhnə Yevlax avtovağzalı tərəfdə bir ucuz çayçı var, çayın da qiyməti 50 qəpikdi, ordayıq. Nəsə salam verdim, görüşdük, oturmaq istəyəndə Xəqani Həbiboğlu üzünü Yusif müəllimə tutaraq dedi ki, ay Yusif müəllim, bu uzunluqda şair olar? Bu ki lap Xan Eyvazdır. Mən də utancaq kənd uşağı, bir az qızardım, bir az da utandım, amma mən də nəsə dedim, yadımda deyil. Xəqani müəllimlə elə ilk tanışlıq burdan başladı. Elə "Xan Eyvaz" adını da şair o vaxt orada verdi məne. Həmin gün şairin öz dilindən bir neçə şeirlərini eşitdim, o şeirlərlə də Xəqani Həbiboğlu və Eyvaz Əyyub dostluğu, əmi-balalıq başladı.  

Bu gün eşitdim ki, əmimin yeni kitabı işıq üzü görüb. Həqiqətən, çox sevindim, çünki Xəqani Həbiboğlu haqqında nə qədər xoş sözlər desəm azdır, çünki bu insan təkcə şair deyil, müəllim deyil, bütün insani keyfiyyətlərin özündə cəmləşdirən bütöv bir şəxsiyyətdir. 

Şairin yaradıcılığını da özü qədər çox istəyirəm. Ümumiyyətlə, "Kəlbəcər poeziyası", "Bakı poeziyası" kimi fikirləri bir vaxtlar qəbul edirdim, amma son dövrlər bunun əleyhinəyəm. Deməyim odur ki, Xəqani Həbiboğlunun şeirləri Kəlbəcər poeziyasından ritminə, intonasıyasına görə, fərqlənir. Aşıq Qəmkəş Allahverdi, İdris Verdiyev kimi dövrünün görkəmli el şairlərinin mənsub olduğu bir ailə də möhkəm təməllər üzərində poeziyaya, ədəbiyyata ayaq açıb, klassik ənənə üzərində öz poeziyasını, dilini yarada bilib. Kəlbəcər kimi zəngin saz-söz mühitində qoşma-gəraylı ritmində çıxıb öz şeirini yazmaq, fərqlənmək çətin məsələdi. Öz istedadı, axtarışları sayəsində bunu da Xəqani Həbiboğlu bacarıb. Ənənəvi Kəlbəcər şeirlərindən olan qoşmaları Xəqani yaradıcılığında çox az təsadüf edilir. Şairi ilk dəfə olaraq "Səni sevilməyə yaradıb dünya" şeiri ilə tanıdım. 

Bu şeirdə təzadlı fikirləri qarşı-qarşıya qoyur və...

Ümumiyyətlə şairin şeirlərinin oxucular tərəfindən sevilməsinin ən başlıca səbəbi özünəməxsus deyimlərin, bənzərsiz bədii təsvir və ifadə vasitələrinin istifadə olunmasıdır. 

18 aprel Xəqani Həbiboğlu günüdür, çünki dünyamıza qədəm qoyduğu gündür. Doğum günün qutlu olsun, əmi. Dünyamızın Xəqanisisən.