Fərid Muradzadə

MƏLƏK

Hardasan axı, hardasan
Qorxulan, hürkülən mələk?
Ey ağ atda, ağ libasda,
Hamıya görünən mələk!

Can alansan deyə-deyə,
Hamı düşür vahiməyə,
Yeddidən yetmiş yeddiyə,
İnsanlar çəkinən mələk!

Bir anlıq vəhmdən sonra,
Əzabdan, zülümdən sonra,
Sanıram, ölümdən sonra,
Hamıya sevilən mələk!


* * *
Bəlkə də yalandır olub-keçənlər,
Bir şirin yuxudur, dünən görmüsən.
İsladıb illəri göz yaşı ilə,
Ömrün divarına necə hörmüsən?

Saqif Qaratorpaq

Bəlkə də yalanmış bu yaşananlar,
Bəlkə də bir anlıq ilğım görmüsən.
Bəlkə də hisslərin aldadıb səni,
İkimiz adına divar hörmusən!

Baxıram üzünün qırışlarına,
Gözüm tab gətirmir baxışlarına
Dərdlərin verdiyi göz yaşlarına 
Sən necə səbr edib, necə dözmüsən?

Bilirəm, asandır təsəlli vermək,
Bilirəm, çətindir bu yükü çəkmək,
Çətindir yaşayıb ömürdən küsmək,
Yaşaya-yaşaya nələr çəkmisən.

Düşmüsən çöllərə divanə kimi,
Yanırsan atəşdə pərvanə kimi,
Bəlkə qalacaqsan əfsanə kimi
Sən diri olsan da ruhən ölmüsən!

Dalidag.az