Fərid Muradzadə

* * *
Dünyanın hər yerində eynidir
Hələ dil açmamış körpə səsləri,
onların ağlamağı, gülüşləri —
dünyanın ən şirin ilk nəğmələri.

Dünyanın hər yerində eynidir
lal adamların jest dilləri,
delfinlərin, balinaların səs dilləri
və sərhədlərin tikanlı məftilləri.

Dünyanın hər yerində eynidir
dənizlərin qəzəbli dalğaları,
iflic bədənin hissiz ağrıları,
kor insanın qaranlıq duyğuları.

Dünyanın hər yerində eynidir
bütün sevincləri susduran
mərmi səsləri, fəlakət rəngləri,
səfalət içindəki insan taleləri.

Dünyanın hər yerində eynidir
meqapolislərin parıldayan sərvətləri,
satılmış vicdanların ucuz qiymətləri,
missionerlərin kirli niyyətləri.

Dünyanın hər yerində eynidir
Çarəsiz olmaq, əzaba dözmək,
sevmək və sevilmək,
mahiyyətcə doğulmaq və ölmək,
ağlamaqla gülmək.

07.07.2026
Dalidag.az