Fuad İslamoğlu       



QURTARARIQ DAĞDAN A DAĞLAR, SƏNİ

Məmməd Aslana

Dağlarım sinəsi dağlı qalıbdır,
Düşmən ayağıyla tapdalanıbdır.
Yəqin ki, küsdürüb, azarlayıbdır,
Ağuşuna alıb ağlarsan məni,
Qaytara bilməsəm a dağlar, səni.

Küsüb-inciməyə haqqı-sayın var,
Bu günahda az da olsa payım var.
Nəyləyim ki, mənim belə "dayım" var?
Qılıncdan keçirib doğrarsan məni,
Qaytara bilməsəm a dağlar, səni.

Bəlkə birdəfəlik səndən küsübür,
Torpaq qorumağa and da içiblər.
Namus, qeyrəti pulla ölçüblər,
Yalan olsa sözüm, dağlarsan məni,
Qaytara bilməsəm a dağlar, səni.

Yaddan çıxarıblar mənim tək səni,
Qoru dağ keçini, kəli, təkəni.
Mis, qızıl mədəni yırtıb tökənin
Başını kəsməsəm boğarsan məni,
Qaytara bilməsəm a dağlar, səni

Verdiyi vədləri çoxları danır,
Toxdur, nə vecinə çünki yalanır.
Vədlər möhürlənir, həm də qollanır,
Qara siyahıya salarsan məni,
Qaytara bilməsəm a dağlar, səni.

Dözdün, bir az da döz, a bəxti qara,
Birləşib taparıq dərdinə çara.
Millət dönük çıxmaz əhdə, ilqara,
Dönsə yuxu kimi yozarsan məni,
Qaytara bilməsəm a dağlar, səni.

Başını dik saxla, mərd, məğrur dayan,
Torpaqları alıb olarıq həyan.
Dünyaya car çəkib edərik bəyan,
Sən də balan kimi sezərsən məni,
Qurtararıq dağdan a dağlar, səni.

   Dalidag.az


P.S. Şair Fuad İslamoğlu dədə şairimiz Məmməd Aslana üz tutub bu şeiri yazanda DAĞLArımız yağı əlindəydi. Bu gün gözəl Kəlbəcərimiz də, uca dağlarımız da azaddı. Məmməd Aslanın ruhuna salam olsun. Fuad müəllimə can sağlığı diləyirik.