Süleyman Hüseynov

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Süleyman Hüseynov yaradıcılığından:

NƏĞMƏLƏR YAZAQ 

Könül, at başından kədəri, qəmi,
Gəl, seyrə çıxaq biz bu xoş aləmi.
Sən mənə ilham ver, mən də qələmi,
Götürüb, bu gündən şeirlər yazaq. 

Baş qoşma naxələf, nadan kəslərə,
Vicdanı, məsləki satan kəslərə ,
Qulaq ver Xudadan gələn səslərə,
O səslər qoymaz ki, düz yolu azaq. 

Yurdumun hər yanı - gözəllik yeri,
Çəkək ruhumuza gözəllikləri.
Qovaq içimızdən şeytanı, şəri,
Bədxah duyğulardan dolanaq uzaq. 

Gəzək bu yerləri hey oylaq - oylaq,
Gözəl təbiəti gəl, bir də duyaq.
Onsuz da çətin ki, dünyadan doyaq ,
Dunyanı duymamış, gedənlər yazıq. 

Sevdiyin cananla verib əl - ələ,
Dağda bəyaz qara, bağda tər gülə,
Baxaq bir doyunca, bəlkə bu elə,
Əlçatmaz, sonuncu görüş olacaq?! 

Dünyaya boş gəlir, boş gedir insan,
Onlardan biri də olsun Süleyman,
Əliboş getsə də, yanar hər zaman,
Qəlbimin sözüylə alışan ocaq,
Bu ocaq xətrinə nəğmələr qoşaq! 

Dalidag.az