Baloğlan Cəlil

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Baloğlan Cəlil yaradıcılığından:

ƏLLƏRİN MƏKTUBDU - SEVGİ MƏKTUBU 

Əllərin təzə - tər ağ gül kimidi ,
Bəs niyə hamardı, tikanı yoxdu? 
Üzünü öpməyə, əzizləməyə 
Mənim əllərimin imkanı yoxdu. 

Hərdən havalanıb uçur göylərə, 
Məxmər tək yumuşaq, ipək əllərin. 
Sonra lələk - lələk yağır qar kimi,
Bənövşə ətirli çiçək əllərin. 

Əllərin məktubdu - sevgi məktubu,
Düşüb dimdiyindən göyərçinlərin. 
Səcdəyə gətirir mələkləri də,
Biraz açıq qalan ağ çiyinlərin .

Bəlkə bir kitabdı, sehirli kitab,
Açıb oxuyuram cizgilərini. 
Ax, mənim ömrümün qışı qutarmır,
Gəzirəm ovcunda yaz günlərimi. 

Gündüzlər Ay kimi gözə görünmür, 
Gecələr yuxumdan çəkilib getmir .
Dolaşır başımda Leyli sayağı ,
Gözümün önündə şəkili getmir .

Bu da bir yuxudu- İlahi yuxu ,
Mən onu yüz yerə yozuram indi. 
Yuxusu pozulmuş durnalar kimi, 
Yuxulu - yuxulu gəzirəm indi .

Dalidag.az