Famil Vaqifoğlu

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Famil Vaqifoğlu yaradıcılığından:

***
Bir də baxıb görərsən barmaqların bükülüb,
Əllərinin içində duaların yox olub.
Bir də baxıb görərsən saçların da tökülüb,
O solmayan üzünün qırışları çoxalıb.

Nə Tanrı duyar səni, nə mələklər əzizlər,
Bütün gecə sübhədək düşüncən yorar səni.
Halına da acımaz o doğmalar, əzizlər.
Nə bir kimsə soruşar, nə kimsə arar səni.

Sızım-sızım sızıldar içindəki duyğular,
Dizlərinə bənd olar yetim qalan qolların.
Gözlərinin önündə hər gün bir az silinib,
Addım-addım yox olar sənə gələn yollarım.

Payıza dönər ömrün, dumantəki sürünər,
Hey məni soraqlayar çiskinli baxışların.
Və bir də yollar boyu öləziyən ümidin,
Küçələrdə islanar, altında yağışların...

Dalidag.az